New Delhi, Jylliew:
Ka ïingbishar ba kyrpang jong ka kynhun National Investigation Agency (NIA) ka la rai pynrem bad pynshitom ïa ki lai ngut kiba shah kynnoh ha ka mukotduma ba thmu ban leh ïa ki kam ïasuhbuit ha ki kam pyntriem ha u snem 2018 kaba ïadei bad ka kynhun lehnoh Ansar Ghazwat-ul-Hind (AGH) kaba la shah ñiew beaiñ, kaba ïadei bad ka jingkurup ïa ki tiar siat bad ki tiar pynbthei na kawei ka jaka sah jong ki khynnah pule ha Jalandhar kaba don ha Punjab, la ïathuh ki heh jong ka kynhun tohkit.
Ka ïingbishar ba kyrpang jong ka kynhun NIA ha Mohali ha Punjab, kaba la rai pynrem ha ka lah sngi U Blei ïa u Zahid Gulzar, u Yasir Rafiq Bhat bad u Mohammad Idris Shah ha katei ka mukotduma, ha ka sngi Palei ha kaba ka la pynbnai ïa ki jingpynshitom pyrshah ïa ki.
Ka jingpynshitom pyrshah ïa kitei ki lai ngut ka long naduh san snem, hynñiew bad shiphew snem ka jingshah set phatok kaba long da ka Rigorous Imprisonment (RI) katkum ki kyndon bapher bapher jong ka Indian Penal Code, Unlawful Activities Prevention Act, Arms Act bad Explosive Substances Act, kaba ïalam sha ka jingshah set phatok kaba slem tam kaba shiphew jong ka RI.
Uwei na kiba shah kynnoh, u Suhail Ahmed Bhat, u la lait na katei ka mukotduma, kaba la mudui nyngkong eh da ki pulit ka Punjab, ha u bnai Risaw, 2018, bad la aiti sha ka kynhun NIA, katkum ka jingbthah jong ka sorkar pdeng, ha u bnai Naiwieng ha u juh u snem.
Kane ka mukotduma ka la sdang naduh ka jingkhynra jong ki pulit ka Punjab ha ka Hostel jong ka CT Institute kaba don ha Shahpur ha Jalandhar, ka la pynlong ïa ki ban kurup ïa ki tiar siat, ki tiar pynbthei na ka kamra ba shong une uba shah kynnoh.
Ka jingïoh kurup ka kynthup ïa ka suloi AK-56, ki kuli, bad ki tiar pynbthei.
Ka jingtohkit jong ka NIA ka la pynpaw ba une uba shah kynnoh u la thmu ban pynïaid shakhmat ïa ki kam jong ka kynhun lehnoh AGH da ka jingthmu ban hiar thma pyrshah ïa ka sorkar pdeng.
