Bengaluru, Jylliew:
Ha ka por ba dang jur bha ki jingshah kynthoh halor ka jingbym don ki kynthei ha ka kynhun Myntri ba dang shu thaw thymmai jong u, u Myntri Rangbah ka Karnataka u DK Shivakumar ha ka sngi Palei u la ong ba ki don katto katne ki kam kiba lait ha katei ka tnad bad ba yn sa ai lad ha ki sngi ban wan.
U Shivakumar, u la bam smai kum u Myntri Rangbah ka Jylla, ha ka sngi Balang, ha ryngkat ki 13 ngut ki Myntri. Ka bor ba la mynjur jong ka kynhun ki Myntri jong ka Karnataka ka long 34 ngut, kynthup ïa u Myntri Rangbah ka Jylla.
“Ai ba kin (BJP) ap; ki don shibun ki kam kiba lait. Ha ka sien kaba la dep ruh, ym shym la don ki kynthei ha ka sien kaba nyngkong. Ngi don baroh hangtei”, la ong u Shivakumar haba jubab ïa ki nongthoh khubor haba jubab ïa ka jingkylli halor ka jingkynthoh jong ki liang pyrshah halor ka jingbym don ki kynthei ha ka kynhun Myntri.
Haba pynpaw ba ka sorkar Congress ka la pyntreikam ïa ki katto katne ki skhim na ka bynta ki kynthei, u la ong, “Ngi la buh ïa ka nuksa ha ka ri.”
U nongïalam ka liang pyrshah ha Assembly u R Ashoka u la kynthah ïa ka sorkar ba kam shym la pynrung ïa kano kano ka kynthei ha kane ka tnad.
Ka jingkynthoh ka la wan ruh napoh ka seng, ha kaba ka heh nongïalam jong ka Congress, ka Margaret Alva, ka la pynpaw “ka jingsngewsih kaba jur” halor ka jingbym don ki kynthei ha ka dorbar thymmai jong ki Myntri sorkar.
Ka jingkhublei sha u DK Shivakumar uba la bam smai kum u Myntri Rangbah ka Karnataka. Nga kitbok kitrwiang ïa u bad ïa ka kynhun jong u. Nga la sngewtynnad ban ïohi ba la kumno kumno kawei ka kynthei Congress ha ka kynhun Myntri thymmai jong ka Karnataka kan smai ha kane ka sngi.
Ka jingsngewsih kaba jur ba ym don kawei ruh,” ong ka Alva, Myntri barim ka sorkar pdeng kaba la shakri ruh kum ka Lat jong ki katto katne tylli ki jylla, ha ka jingthoh jong ka ba la phah ha ka rynsan X.
Ki 11 ngut na ki 13 ngut ki Myntri kiba la shah pynrung ha ka kynhun Myntri ba ïalam da u Shivakumar ki dei ki bynta jong ka sorkar Siddaramaiah kaba mynshwa.
Kaba sngewtynnad ka long ba ïa u khun jong u Siddaramaiah bad MLC Yathindra ruh la pynrung ha kane ka tnat. Hynrei ym shym la pynrung ïa ki nongthaw aiñ kynthei ha ka bynta ba nyngkong jong ka jingthaw ïa ka kynhun Myntri.
U Yathindra bad u T Khader, kiba la iehnoh ïa ka kam kum u Lamphang ka ïing dorbar thawaiñ ka jylla, ki dei tang ki arngut ki khmat thymmai ha ka kynhun Myntri, katba ki Myntri kiba dang sah, ki dei shi bynta jong ka tnad Myntri ba mynshwa jong u Siddaramaiah.
U MLA ba rangbah jong ki Dalit u G Parameshwara u la shah thung kum u symbud Myntri Rangbah ka Jylla.
Ka Lakshmi Hebbalkar ka dei tang ma ka ka Myntri kynthei ha ka sorkar Siddaramaiah kaba mynshwa.
