Patna, Jylliew:
Hadien ba la sakhi ïa kawei ka jingjia kaba la pynpar ñiangkhriat ïa kiba bun, ki bor ba dei khmih, ki la pynduh noh ïa ka License jong kawei ka hospital jong ki riewshimet ha Muzaffarpur hadien ba ka la don ka jingpluh ding kaba shykhei ha ICU jong kane ka hospital kaba la shim ïa ka jingim jong 6 ngut ki nongpang.
Ka Civil Surgeon ka la weng noh ïa ka License jong kane ka jaka sumar tang kyndiat por hadien ba la jia ka jingjia.
Kumba la sakhi, la ong ba kane ka jingjia ka la long kaba shyrkhei haduh katta katta ha kaba ka la shim ïa ka jingim jong kine ki briew.
Na ka jingkhmih bniah, la ong ba kane ka lah ban dei na ka jingleh torti jong kiba dei ban peit ha katei ka jaka, naba ka dei ka bym long ban duh briew bad kaba la hap ban don ki nongtrei ha baroh 24 kynta.
Ka Civil Surgeon ka la pyntip sha ka lad phah khubor, ba dang pynlong ïa ka jingtohkit na baroh ki liang shaphang kane ka jingpluh bad yn sa shim khia katkum ka jinglap ïa ki sakhi baroh.
“Ka jingtohkit kaba long katkum ki buit kane ka juk kaba mynta, la pynlong ha baroh ki bynta, bad yn sa pynshitom da kaba tyngeh lada lap ïa kiba long ka daw halor ka jingjia,” ka la ong.
Ka jingdon jong kiba ïap ha ka jingjia, ka la kiew sha ki 6 ngut hadien ba la don sa uwei u nongpang ba la ïap ha ka por ba dang shah sumar ha ka sngi Thohdieng. Ha ka sngi Palei, ki la don kumba 5 ngut ki nongpang ki la ïap bad 17 ngut kiwei pat ki la mynsaw na ka jingkem ding ha kane ka hospital.
Ka la don ka jingujor ejahar halor ka jingjia bad la kem ruh ïa lai ngut ki nongtrei ba kynthup ïa uwei u doktor, ha kaba ïadei bad kane ka jingjia.
U Sub-Divisional Magistrate (SDM) u Tushar Kumar haba ïakren bad ki lad pathai khubor u la ïathuh ba ïa ka bai lutksan la dep ban ai sha ki longïing kiba shah ktah, katba ïa ki jingïarap sha kiba dang sah yn sa ai noh shen.
Ïa ka khubor jong ka jingpluh ding la ïoh jingtip ba ka la jia shi sngi hadien ba la jia ka jingpluh ding ba shyrkhei jong kawei ka jaka sah bad jaka bam jingbam step kaba don ha Malviya Nagar ha South Delhi kaba la jia ha ka step jong ka sngi Balang.
Ha kaba ïadei bad ka jingjia kaba jia hashwa, la ong ba ki la don 21 ngut ki briew kiba la ïap, kynthup ïa ki 17 ngut ki bar ri bad kiba bun kiwei pat ki la mynsaw.
Ha ka por ba la pynlong ïa ka jingtohkit, la kynnoh ba ki bor pynïaid ki la lap ïa ki jingpynkheiñ ïa ki kyndon ban buh jingshngaiñ bad ki jingduna kiba bun ban buh ha kaba ïadei bad ki lad ban ïada na ka jingpluh ding.
