New Delhi, Jylliew:
Ka seng BJP ka la dep ban pynbna ïa ki kyrtong ki ban ïakhun ha ka elekshon Rajya Sabha ka ban sa wan, ha kaba ka la pynïakhun da u M. Nagaraja na Karnataka bad u Mahesh Kewat na Madhya Pradesh. Ka seng ka la ai ïa kane ka jingpynbna ha ka sngi U Blei.
Ka seng ka la jied ruh ïa u Lingaraj Patil bad u Raghu Kautilya kum ki kyrtong jong ka ha ka elekshon sha ka dorbar thaw aiñ jong ka Karnataka. U Kharge u thep kyrteng na ka bynta ka elekshon Rajya Sabha na Karnataka
Ka kynhun pdeng kaba dei khmih halor ki kam elekshon jong ka seng BJP ka la mynjur ïa ki kyrteng jong kitei ki kyrtong, ong u National General Secretary ka seng u Arun Singh ha ka jingpynbna. Ka elekshon Rajya Sabha na ka bynta ki 24 tylli ki konstitwensi ha ki 10 tylli ki Jylla, kiba kynthup ïa Arunachal Pradesh, Gujarat, Madhya Pradesh, Rajasthan, Manipur bad Karnataka, kan long ha ka 8tarik, Jylliew.
Ka jingïakhun ban ïoh ïa ki lai tylli ki shuki Rajya Sabbha jong ka Madhya Pradesh, ka la rung sha ka bynta kaba thymmai, ha kaba ka Congress, ka la sei madan da ka MP barim jong ka Mandsaur, ka Meenakshi Natarajan, na ka bynta katei ka shuki, kaba la pynlait da u heh nongïalam u Digvijaya Singh, katba ka BJP, ka la dep ban pynïeng ïa u National General Secretary jong ka, u Tarun Chugh bad u State Secretary jong ka seng BJP ha Madhya Pradesh u Rajneesh Agarwal na ka bynta ki ar tylli ki shuki ba ka seng ka bat mynta.
Ka BJP ka don ïa ki nombar ban jop da kaba suk ar tylli ki seat, katba ka Congress ka paw ba ka don ha ka kyrdan ban bat ïa kawei. Hynrei kane ka lah ban long kawei na ki elekshon Rajya Sabha kaba la peit bniah bha ha kine ki snem ba la dep.
Ka elekshon na ka bynta ki 26 tylli ki shuki Rajya Sabbha ha kylleng ki 12 tylli ki jylla la buh ban long ha ka 18 tarik u Jylliew, ha kaba la khmih lynti ban ñiew vote ha katei kajuh ka sngi.
Hadien bun sngi jong ka jingïakhih kaba jur bha ha Delhi kaba la ïadon bynta lang bad katto katne ngut ki heh nongïalam jong ka kynhun ba hakhlieh jong ka seng Congress ka la jied ïa ka Meenakshi Natarajan, ka MP barim na Mandsaur bad ka paralok ba ïajan eh jong u Rahul Gandhi, kum ka nongmihkhmat jong ka sha Rajya Sabha.
Ka jingjied jong ka, ka long hadien ba ka seng, ka la thew ïa kiba bun tylli ki kyrteng, kiba kynthup ïa u Arun Yadav, Priyavrat Singh, u Shobha Oza bad kiwei kiwei.
U Natarajan, uba bat mynta ïa ki kam ba kongsan jong ka seng na ka bynta ka seng, la niew ïa u kum u nongïashim bynta uba don ïa ka jingshim jingmut kaba khlaiñ bad uba don ki tynrai kiba jylliew ha ka saiñ hima sima jong ka Madhya Pradesh.
Katba ka BJP pat ka la bteng ban pynksan ïa ka jinglong nongïalam sengbhalang da kaba pynïeng ïa u Tarun Chugh bad u Rajneesh Agarwal.
U Chugh, u dei u nongmihkhmat jong ka ri, uba shong ba sah ha Punjab bad u dang shakri mynta kum u National General Secretary jong ka seng BJP bad u la bat ïa ki katto katne ki kam ba kongsan, ba kynthup ïa ka Jammu & Kashmir, Ladakh bad Telangana.
U Rajneesh Agarwal uba la pyndep ïa ka kam thoh khubor, la tip ïa u hapoh ka BJP kum uwei na ki riewstad ba kongsan jong ka ha ka liang ka jingpynïaid ïa ki Booth-Management ha Madhya Pradesh, bad u la kiew lyngba ki kyrdan jong ka RSS, ABVP bad ka seng BJP ha kine ki laiphew snem ba la dep.
Ki nongïalam jong ka seng ki ai burom ïa u ba u la don ka bynta kaba khraw ban pynkhlaiñ ïa ka jinglong tynrai jong ka BJP hashwa ki jingjop elekshon dang shen.
Katba ki jingpynbna ba thikna ki ai jingmut ïa ka jingmih kaba ju long 2-1 kaba kyrshan ïa ka BJP bad ka Congress, ki nongkhmih bniah ha ka saiñ pyrthei ki nang kylli ïa ka jingkylli kaba pher, hato ka BJP kan pynïeng ia u kyrtong uba lai?
Ha ka ïingdorbar jong ka Madhya Pradesh kaba don 230 ngut ki dkhot, uwei u kyrtong u donkam 58 vote ban ïoh ïa ka elekshon sha Rajya Sabbha.
Ka jingkhlaiñ jong ka BJP kaba don kumba 165 ngut ki MLA ka pynthikna da kaba suk ïa ar tylli ki seat, kaba bam 116 vote bad iehnoh ïa ka seng da kumba 47 vote tam.
Ka Congress kaba don 65 ngut ki MLA kam trei shuh da kata ka bor kaba pura. Ka jingbishar ba dang ïaid shakhmat pyrshah ïa ka MLA ka Bina, ka Nirmala Sapre bad ka jingbym lah ban thep vote jong u MLA ka Vijaypur, u Mukesh Malhotra, ka la pynduna shisha ïa ka jingkhlaiñ jong ka seng.
Kata ka iehnoh ïa ka Congress tang ïa ka bynta kaba rit halor ka jingdon jong 58 vote kaba donkam ban jied ïa ka Meenakshi Natarajan.
Lada ka BJP ka rai ban tynjuh ïa ki um da kaba buh kyrtong ba lai, da kaba don kumba 47 vote ha kti hadien ba ka la ïoh ar tylli ki seat, ka BJP kan donkam kumba 11 vote shuh shuh ban pynlong ïa ka seat kaba lai kaba lah ban ïakhun.
Ki nongkhmih bniah ha ka kam saiñ hima sima ki kdew ba hangne wat tang katto katne ki jingbym thep vote, ki jingïathep vote ba ïapher ne ki jingjia bym lah khmih lynti ki lah ban pynkylla shibun ïa ka jingmih.
Hapoh ka jingïalam jong ka seng Congress, katto katne ki jingjia kiba dang shen ki la dep pynmih ïa ka jingïakren.
Ka jingïashim bynta jong u MLA u Abhijit Shah ha ka jingïalang jong ki Hindu ba la ïashim bynta da ki kynhun ba ïadei bad ka RSS bad ki jingkren kham mynshwa jong u MLA ka Congress u Bhairo Singh Parihar ha kaba ïadei bad ka jingbteng jong u ban ïadei bad ki kynhun jong ka RSS, ka la pynmih ïa ka jingkynthoh hapoh ki kynhun saiñ hima sima, wat la ym don uwei ruh na ki nongïalam uba la pynpaw ïa kano kano ka jingthmu ban pyrshah ïa ka laiñ jong ka seng.
