Chennai, Jylliew:
Ka jingïalang jong ka kynhun Myntri kaba nyngkong jong ka sorkar ba la ïalam da ka seng TVK, kaba la pynïaid da u Myntri Rangbah ka jylla C Joseph Vijay ha ka taïew ba la lah, ka la buh ïa ka road map kaba don jingthmu kaba kynthup ïa ki 436 tylli ki jingthmu pynroi kiba jrong, da kaba pynleit jingmut ha ka jingsynshar kaba lait na ka bamsap.
U Myntri ka Energy Resources bad ka Law u CTR Nirmal Kumar u la pynsngew sha ki nongthoh khubor ha ka jingïalang kaba la neh shi kynta. U Myntri u la ong ba u Myntri Rangbah u la wanrah ïa ki lad pynroi na ka bynta baroh ki tnad treikam hapoh ka kyrteng ‘Vetri Thamizhagam’.
U Myntri Rangbah u la buh ïa ki thong ba kyrpang na ka bynta kawei pa kawei ka tnad, da kaba batai ïa ka lynti ha kaba ki dei ban ïaid shaphrang bad ki jingthmu ba ki dei ban pynurlong.
Ïa kine ki jingthmu la phiah hapoh 10 tylli ki ‘nongrim’, bad la phiah ha ki bynta kiba rit bad kiba bun ki ‘Vision Statements’ (VS).
Ki nongrim ki kynthup ïa ka jinglong Tamil bad ka jingsarong (52 VS), ka jingim kaba don burom bad ka jingshngaiñ ha ka imlang sahlang (93 VS), ka jingbha jingmiat jong ki kynthei (24 VS), ka jingbha jingmiat jong ki samla (18 VS), ka jingbha jingmiat jong ki nongrep, ki nongtrei rep, bad ki nongtong dohkha (50 VS), ka jingnang jingstad kaba ha ka kyrdan pyrthei (20 VS), ka jingroi jingpar (20 VS), ka roi ka par). (22 VS), ki jingtei kiba pawnam ha ka pyrthei (32 VS), bad ka jingsynshar kaba hok bad kaba shai (26 VS).
U Nirmal Kumar u la ong ba u Myntri Rangbah u la bthah ïa ki Myntri, ha ka jingïamir jingmut bad ki heh jong ki, ban pynkhreh ïa ki plan pyntreikam kiba bniah, ban buh ïa ki por ba donkam ban pyntreikam, bad ban wad ïa ki lad ki lynti ban pynthikna ba kin pyndep kloi ïa ki.
U Myntri u la ong ba ki nongrim bad ki nongrim rit ki kynthup ïa ki jingkular ba la ai ha ka jingpynbna ïa ki mat treikam ha ka jingïalap elekshon jong ka TVK.
“Baroh ki Myntri kin bishar bniah ïa kine ki jingthmu, kin pynkhreh ïa ki plan pyntreikam kiba bniah, bad, ynda ki la ïoh ïa ka jingmynjur jong u Myntri Rangbah, kin sdang ïa ka rukom pyntreikam,” ong u Nirmal Kumar.
“Kawei na ki jingthmu jong ngi ka long ka Tamil Nadu kaba lait na u drok. Baroh ki tip haduh katno ki jingdih pynbuaid ki la nang jyllei ha Tamil Nadu ha kine ki san snem ba la dep.
U Myntri Rangbah u la bthah ïa ki pulit ban shim ïa baroh ki sienjam ban pynduhjait ïa ka jingma jong u drok,” u la bynrap.
U Myntri u la ong shuh shuh ba ka jylla kan shim ïa baroh ki sienjam katkum ka aiñ pyrshah ïa ka jingpyrshang jong ka Karnataka ban tei ïa ka dam Mekedatu ha shiliang ka wah Cauvery.
Katkum ki tyllong khubor, ha katei ka jingïakynduh, u Vijay, ha ka rukom kaba ïajan, u la ong ïa ki Myntri ba kin long kiba thrang ban pynthikna ïa ka “synshar kaba bha bad kaba khuid haman la ka sienjam” namar kata ka dei kaba ki paidbah ki khmih lynti bha na ka sorkar.
Ki tyllong khubor ki ïathuh ba u Myntri Rangbah u la kyntu ruh ïa ki paralok jong u ha ka kynhun Myntri ba kin pyndep ïa la ka kamram da ka jingkyrmen kaba bha.
