Kolkata, Jylliew:
Ka Mamata Banerjee, kaba la long Myntri Rangbah la lai sien ha ka jylla West Bangal bad ka Myntri Rangbah barim, ka dang don ha ka jingma kaba khraw ha ka saiñ pyrthei, namar ba ka kynhun Crime Investigation Department (CID) ki la poi ha ka ïingsah jong ka ha Kolkata, ha kaba ïadei bad ka jingtohkit jong ka, halor ka jingkynnoh ba ka la pynbud thok ïa ki jingsoi kyrteng ki MLA, kaba la pynmih ïa ka ïapait ïapra kaba khlem pat ju jia mynno mynno ruh ha ka seng Trinamool.
Ki ophisar jong ka tnad tohkit jong ka jylla, ha ryngkat ki briew na Kalighat police station bad ka kynhun kaba heh jong ki pulit kynthei, ki la poi ha ka ophis pdeng jong ka seng kaba don ha 30B Harish Chatterjee Street ha ka por shiteng sngi, la ïathuh ki tyllong khubor.
Kane ka jingpyntreikam jong ka kynhun CID ka long hadien katto katne sngi ba ka tnad ka la ai ïa ki jingpynbna ban pan jingtip kiba ïadei bad ka jingkynnoh ba la soi thok ïa ki jingsoi jong ki nongthaw aiñ ka Trinamool halor ka jingtyrwa ba la aiti sha u Lamphang ka Ïingdorbar ban ithuh ïa u Nongïalam ka Liang Pyrshah.
Katkum ka jingïathuh ki heh jong ka CID kiba la don ha katei ka jaka, la pan ïa katei ka jingtalasi halor ka jubab ba la aiti da u National General Secretary jong ka Trinamool, u Abhishek Banerjee, halor ka jingpynbna ba la pynmih kham hashwa da kane ka tnad.
“Ha ka jubab jong u, u Abhishek Banerjee u la pynpaw ba la lum ïa ki jingsoi jong ki MLA ha ophis pdeng jong ka seng ha 30B Harish Chatterjee Street. Da kaba pynshong nongrim ïa kata ka jingkren, ngi la wan hangne kum shi bynta ban tohkit,” la ong uwei u ophisar ka CID. Lai tylli ki kynhun CID ki dang pynlong ïa ka jingtalasi.
Kawei ka kynhun ka don ha ïing sah jong ka Mamata Banerjee, kaba don shabar ha Delhi. Kawei pat ka kynhun ka don ha ka ophis jong u khun kha jong ka Mamata Banerjee bad u MP u Abhishek Banerjee. Ka kynhun kaba lai ka don ha ïingsah jong u Abhishek Banerjee.
Kane ka jingïakynad ka la mih hadien ba ka jingtyrwa kaba la phah sha u Lamphang ka ban pan jingithuh ïa u MLA ba rangbah jong ka Trinamool u Sovandeb Chattopadhyay kum u Nongïalam ka Liang Pyrshah la kynnoh ba ka don ïa ki jingsoi thok jong ki katto katne ngut ki nongthaw aiñ.
Arngut ki MLA ka Trinamool, kiba kynthup ïa ka Ritabrata Banerjee bad ka Sandipan Saha, ki la ujor sha u Lamphang ba katei ka Resolution kaba la khot ka dei kaba “shna bad shna thok” bad ki la pynpaw ba haduh 14 tylli na ki 70 tylli ki jingsoi ki dei ha ki dak heh.
Ki jingkynnoh ki la ïalam sha ka jingpynrung ejahar bad ka jingtohkit jong ka kynhun CID. Ka Trinamool ka la beh noh ïa baroh arngut ki MLA na ka seng namar ka jingkynnoh “ki kam pyrshah seng”, katto katne minit hadien ba u Myntri Rangbah ka jylla u Suvendu Adhikari u la pynpaw paidbah ïa ki kyrteng jong ki.
