New Delhi, Jylliew:
Ka Myntri Rangbah jong ka Delhi, ka Rekha Gupta, ka la dawa ban pynbun ïa ka pisa jong ka sorkar pdeng na ka bynta ka Delhi bad ban pyllait ïa ka pisa ba sah ha ka Public Account jong ka nongbah ha ka jingïalang jong ka NITI Ayog ha ka sngi Palei.
Ka la kyrpad ruh ban pynïakhlad pura ïa ki nongtrei PWD jong ka Delhi na ka tnad treikam paidbah jong ka sorkar pdeng, ban pynsted ïa ki kam paidbah bad ban buh ïa ka rukom synshar kaba shai, la ong ka ophis treikam jong ka Myntri Rangbah ka jylla ha ka kyrwoh.
Ka Myntri Rangbah ka la buh katto katne ki jingkyrpad kiba kongsan ha ka liang ka synshar khadar bad ka pisa tyngka sha ka sorkar pdeng ban pynsted ïa ka jingkiew jong ka Delhi.
Ka la kdew ba namar ba la pynïakhlad ïa ka Public Account jong ka Delhi na ka sorkar kmie ha u snem ba la dep, ïa ka pisa kaba dang sah dei ban pynbeit bad pyllait kloi katba lah.
Ka Delhi kam ïoh bhah ha ka khajna lane ka jingai jingïarap na ka Finance Commission, la ong ka Gupta, da kaba kyrpad ba dei ban pynkiew ïa ka kyrdan jingïarap jong ka sorkar pdeng ba la ai sha ka Delhi katkum ka jingpynkylla ba la leh sha kiwei pat ki jylla.
Hapoh ka ‘Bhavya Yojana’ jong ka sorkar pdeng, kaba kyntiew ïa ki karkhana shna tiar, ka la kyntu ba dei ban kynthup ruh ïa ka Delhi na ka bynta ki buit thymmai, ka tnad ai jingshakri bad ki karkhana shna tiar kiba lait na ka jingjaboh, haba pyrkhat ïa ka jinglong kyrpang jong ka nongbah.
Haba pyni ïa ka jingthmu jong ka na ka bynta ka jingkiew jong ka nongbah bad ka bynta jong ka Delhi ha kaba tei ïa ka ‘Viksit Bharat@2047’, ka Gupta ka la pynpaw ïa ki jingthmu jong ka sorkar jong ka, kynthup ha ki bynta jong ka jingpynkupbor ïa ki kynthei.
