Coimbatore, Jylliew:
Ka seng Communist Party of India (CPI) kam dei shuh ka bynta jong ka Secular Progressive Alliance (SPA) kaba la ïalam da ka DMK ha Tamil Nadu, ong u M Veerapandian uba long u State Secretary jong ka jylla ha ka sngi Palei.
U la ong ba ka jinglong jingman ha ka sain pyrthei kaba mynta kam long kaba ïahap ïa ka seng ban sah ha ka jingïateh lok. Haba iakren bad ki nongthoh khubor ha ophis jong ka seng ha Coimbatore, u la ong ba ïa kane ka rai la shim ha ka jingïalang jong ka Executive Committee dang shen.
Haba jubab ïa ka jingkylli hato ka CPI ka ai jingkyrshan ne em ïa ka sorkar ba la ïalam da ka TVK katkum ka jingbthah jong u president ka DMK, u MK Stalin, u Veerapandian u la ong ba kane ka rai ka dei baroh shi katta jong ka CPI.
“U (Stalin) um shym la tuklar ïa ki kam pohïing jong ka seng jong ngi lane ban pynbor ïa ngi ban kyrshan ïa ka TVK. Ngim tip balei u president ka DMK u la kren kumne”, u la ong.
Haba batai ïa ka jingïeng jong ka seng, u Veerapandian u la ong ba ki paidbah ki la ai bor ïa ka TVK ban thaw ïa ka sorkar. Ha ka jingshai jong kata ka rai, ka CPI ka la rai ban ai jingkyrshan nabar ban pynthikna ba ka Tamil Nadu kan ym shah buh hapoh ka jingsynshar jong u President ne shah pynbor ban rung sha kawei pat ka elekshon.
“Ka CPI kan long beit shi bynta jong ki bor synshar paidbah.Ka DMK, AIADMK, bad TVK baroh ki dei ki bor synshar paidbah, bad ngim kheiñ ïa ki kum ki nongshun jong ngi. Ki nongshun ha ka jingmut jingpyrkhat jong ngi ki dei ka BJP bad ka RSS”, u la bynrap.
U la ong shuh shuh ba ka CPI kan dang bteng ban long shi bynta jong ka kynhun Left kaba kham heh kaba aiti na ka bynta ka jingbha jingmiat jong ki paidbah bad ka jaitbynriew.
“Ka rai halor ki jingïateh lok na ka bynta ki elekshon ban wan yn sa shim ha ka por kaba biang”, u la ong.
Ha kaba ïadei bad ka jingsynshar, u nongïalam ka CPI u la ong ba ka jylla ka dei ban bteng ban bat ia ka polisi ar ktien, ban kiar na kaba pyntreikam ïa ki saw tylli ki aiñ treikam, bad ban weng noh ïa ki ram jong ki nongrep.
Haba kynthoh halor ka jingmih noh jong ka CPI na ka SPA, u secretary jong ka seng DMK u RS Bharathi u la ong ba ka seng kan bteng ïa ka jingïaid lynti jong ka saiñ hima sima khlem da kheiñ ïano ïano ruh kiba ïasoh ne mih noh na ka kynhun synrop. U la pynkynmaw ba naduh u snem 1971, ki seng Left ki la iasoh bad ka DMK alliance bunsien bad ki la mih ruh bunsien.
“U Veerapandian u la ong ba kim don bad ka DMK na ka bynta mynta; um shym la ong ba ka long junom. Katba ka DMK ka long, lada ki don bad ngi, ngin ïatreilang bad ki. Lada ki pyrshah ïa ngi, ngin pyrshah ïa ki bad bteng ïa ka jingleit jong ngi”, u la ong bad bynrap ba kajuh ka rukom kan treikam ïa kano kano ka seng kaba ïasoh ne kaba ieh ïa ka kynhun synrop.
