Bhopal, Jylliew:
Ka Additional District bad Sessions Court ha Narmadapuram distrik jong ka bynta ba marpdeng jong ka jylla Madhya Pradesh ka la rai pynrem ïa ki 14 ngut ki briew ba kin shah set patok shirta jingim halor ka jingpynïap beiñ ïa uwei u Muslim na Maharashtra halor ka jingkynnoh ba u khaïi tuh ïa ki masi ha ka jingjia kaba la jia ha u bnai Nailar jong u snem 2022.
Ka rai ban set shirta jingim, ka dei kaba la pynbna da u Tabassum Khan u ba long u nongbishar jong ka Seoni Malwa-Narmadapuram Additional District bad Sessions Court ha ka sngi Thohdieng, hadien ba kine kiba la shah kynnoh ki la shah rai pynrem halor ka jingthombor kaba la jia ha ka 3 tarik, Nailar, 2022 pyrshah ïa u nongshong shnong jong Amravati (Maharashtra) u Nazir Ahmad, kine kiba la shah rai pynrem ki kynthup ïa u Deepak ba la tip ruh da ka kyrteng kum u Baba Kevat (38), Ajju ba la tip ruh kum u Ajay Rathore (36), Prakash Kaushal (33), Chetan Maratha (23), Pawan Bathav (31), Amar ba la tip ruh da ka kyrteng kum u Bhola Bathav (38), Kanhaiya Bathav (32), Devendra ba la tip ruh kum u Chhotu Kori (22), Sandeep ba la tip ruh da ka kyrteng kum u Raja Kaushal (26), Anuj ba la tip ruh kum u Ballu Raghuvanshi (24), Sanju ba la tip ruh kum u Rajendra Kaushal (39), u Akash ba la tip ruh kum u Pintoli Bathav (31), u Gaurav Yadav (24) bad u Akash Sarathe (33).
Ki bahaïing hasem jong kiba shah rai pynrem hadien ki la ïalum paidbah shabar ka jaka bishar haba ki la tip ïa katei ka rai.
Katba ki pulit ki la ïaleh ban pynkynriah ïa kiba shah rai pynrem sha phatok, ki bahaïing hasem jong kiba shah kynnoh ki la pyrshang ban pynsangeh ïa ka kali pulit, ha kaba katto katne na ki bahaïing hasem ki la pyrshang wat ban thiah hakhmat ka kali ban khanglad ïa ka jingïaid lynti jong ka.
