Kolkata, Jylliew:
U Myntri Rangbah jong ka West Bengal u Suvendu Adhikari, ha ka sngi Thohdieng, u la pynthikna ba ka sorkar BJP, kan sa rah biang ïa ka Tata Group ha ka jylla.
U Myntri Rangbah u la kynnoh ruh ïa ka sorkar barim ba la ïalam da ka CPI-M ka Left Front bad Trinamool Congress ba ki la shim jubor ïa ki jaka puta. U la kdew ruh ba ki sorkar ki dang sahkut ha ki ‘photo session’ ha ka kyrteng jong ka jingpynmih karkhana ha ka Jylla.
Haba kren sha ki lad pathai khubor ha ka jingïalang bad ki nongthoh khubor na ka bynta ban rakhe ïa ka jingdap 12 snem jong ka sorkar u Myntri Rangbahduh u Narendra Modi ha ka sorkar pdeng, u la ong, “Ngin wanrah biang ïa ki Tata ha Bengal.”
U la kdew ïa ka kynhun ba dei khmih ïa ki karkhana, kaba la pynkynriah ïa ka projek shna kali rit sha Sanand na Singur ha u snem 2008 namar ka jingïakynad jong ka sorkar Left halor ka jingshim jaka, kaba la pynmih ïa ka jingïakhih lehnoh kaba la kynnoh ba la pynlong da ka Trinamool Congress ba la ïalam da ka Mamata Banerjee ryngkat ka jingkyrshan na kiwei pat ki seng ka liang pyrshah.
U Suvendu u la pynthikna ban thaw ïa ka jinglong kaba ïadei bad ka jingbei tyngka ban pynim biang ïa ki kam karkhana ha West Bengal, bad u la ong ba ka sorkar jong u kan thaw ïa ki kam khlem da pynbud biang ïa ki jingbakla kiba la pynmih ïa ka jingkynriah jaka ha Singur bad Nandigram.
“Ngi dang ïoh ïa ki jingtyrwa bei tyngka na ki nongbei tyngka, hynrei ngi hap ban peit bniah ïa ki kot ki sla jong ki, la ki don ne em kino kino ki mukotduma thok ha ki bank ne ha ka jaka pyrshah ïa ki, lane lada ki donkti ha kino kino ki jingïakynad halor ka jingklop pisa, shwa ba ngin ïaid shakhmat ban seng ïa ki karkhana ha ka Jylla,” u la ong da kaba bynrap, “Ngi la dep ban thaw ïa ka kynhun ba kyrpang jong ka Jylla.”
Kaba kham kongsan ka long ba hadien ba u la shimti ïa ka kam kum u Myntri karkhana ha ka sngi Balang, u Roy, u riew saiñpyrthei ba la rim bha bad u MLA ka BJP na Maniktala konstitwensi ha Kolkata, u la pynlong ïa ka jingïalang bad ki heh ophisar jong ka tnad jong u ban dro ïa ka roadmap na ka bynta ban pynthymmai ïa ki karkhana ha Bengal.
Haba kren sha ki lad pathai khubor, u Roy u la ong ba un pyrshang katba lah ban wanrah biang ïa ka Tata Group bad kiwei kiwei ki kompeni heh ha ka kam karkhana na ka bynta ban bei tyngka ha Bengal khnang ba ka Jylla kan lah ban ai kam ai jam ïa ki lak ngut ki samla kiba khlem kam khlem jam.
“Ka jingthmu ba kongsan jong ngi ka long ban pynlong ïa ka jylla kaba ïadei bad ki karkhana na ka bynta ki jingbei tyngka. Ka jingpyrkhat ba nyngkong jong nga kan long ban wanrah biang ïa ki Tata ha ka rukom kaba heh ha ka Jylla. Ka jinglong jingman ba la thaw da ka sorkar Trinamool Congress barim ka long kaba sngewsih. Ngi kwah ban phah ïa ka khubor kaba khlaiñ ba ka Bengal ka long kaba la pynkhreh na ka bynta ka karkhana sa shisien,” u la ong ha ki nongthoh khubor.
U la ong ba yn pyrshang ruh ban wanrah biang ïa palat 6,500 tylli ki karkhana bad ki nongseng kam seng jam kiba la pynkynriah ïa ki unit jong ki shawei pat shabar jong ka Bengal ha kine ki snem.
Ha u snem 2008, ka jingmih noh jong ka Tata Motors ka la wanrah ïa ka jingkylla kaba khraw ha ka saiñ hima sima jong ka Jylla, kaba la pynhap noh ïa ka Left Front na ka bor bad pynkhih ïa ka Mamata Banerjee sha ka bor synshar.
