Vijayawada, Jylliew:
U Myntri Rangbah jong ka jylla Andhra Pradesh u Nara Chandrababu Naidu u la ïakynduh ïa u Myntri Rangbahduh jong ka Singapore u Lawrence Wong ha ka jingleit jngoh jong u kaba ar sngi sha Singapore ha ka Lah sngi U Blei bad u la ïakren halor ka jingïatreilang arliang mamla ha ka liang ka Technology, ka jingpynroi sor, ki Semiconductors, ki Quantum technologies, ka pule puthi, ka khaïi pateng bad ka roi ka par kaba neh.
Ha ka jingïalang kaba 30 minit ha ka ïingsah jong u Myntri Rangbahduh katei ka ri, u Chandrababu Naidu u la khot sngewbha ïa ka Singapore ban wad bniah ïa ka jingwanrah ïa ki mar rep bad ki mar um na Andhra Pradesh, khamtam ïa kito kiba rep lyngba ki rukom rep ba tynrai.
U Myntri Rangbah ka jylla u la pynpaw ïa ka jingpyrshang jong ka Andhra Pradesh ban kyntiew ïa ka rep ka riang bad pyntip sha u Myntri Rangbahduh ka Singapore ba ka State ka dang trei ban buh ïa ki rukom pynshisha kiba khlaiñ bad ki rukom wad bniah ïa ki mar rep ba bun rukom.
U la kyrpad ïa ka Singapore ba kan pyrkhat ban wanrah ïa ki mar rep ba la pynskhem bad ki mar um na Andhra Pradesh.
