Patna, Jylliew:
Ki pulit jong ka Bihar ki la pyntikna ba ka jingtohkit halor ka jingdon jong ka jingjia ba la die ïa ki jingkylli eksam sha ki samla thoh eksam bapher bapher ka dang ïaid shakhmat. Kumba la ïathuh, la ong ba ki pulit hadien ka jingïohkem ïa kiwei pat kiba la shah kynnoh donkti, ki la bteng ïa ka jingtohkit bniah ban lap bad ïohkem lut ïa kiba donkti ha kane ka kam beaiñ.
Ha kaba ïadei bad kane, ki pulit ki la ïathuh ba ki la ïoh ban kem sa ïa saw ngut ki briew halor ka jingkynnoh ba ki la die ïa ki kot jingkylli thok jong ki eksamin bapher bapher, ba kynthup ïa ka National Eligibility cum Entrance Test, Undergraduate (NEET-UG) sha ki samla kiba thmu ban pule bad ki kmie ki kpa jong ki na Muzaffarpur distrik, la ïathuh uwei u heh ophisar ha ka sngi U Blei.
Kine ki briew kiba la shah kem ki dei kiba la tip kyrteng kum u Harsh, Aman Kumar, Kanhaiya Kumar bad u Harsh Kanodiya.
Ki pulit ki la kem ïa kine ki saw ngut ha ka janmiet jong ka sngi Saitjaiñ bad ki la ïoh ban kurup lai tylli ki mobile phone na kti jong ki.
“Ki briew kiba la shah kem ki dei kiba pyntreikam ïa ka kynhun kaba thok ïa ki kmie ki kpa kiba la duh jingkyrmen da kaba die ïa ki kot jingkylli thok jong ki eksamin bapher bapher, kynthup ïa ka NEET, lyngba ki Social Media”, la ong u Senior Superintendent of Police jong ka Muzffarpur, u Kantesh Kumar Mishra ha ka jingïakren bad ki nongthoh khubor.
“Da kaba pynshong nongrim halor ka jingtip ba la ai da uwei u briew ba la tip kyrteng kum u Manish Jha, uba la shah kem ha ka 2 tarik, Jylliew na ka thaiñ Balu Ghat kaba hap hapoh ka jingpeit jong ka Sikandarpur police station halor kajuh ka jingkynnoh, ki pulit ki la kem saw ngut ki paralok jong u ha ka sngi Saitjaiñ,” bynrap biang u Mishra.
Ha ka jingtohkit bad katkum ka jingphla jong ki, la pynpaw ba ki pyndonkam ïa ki rynsan Social Media ban thok ïa ki nongthmu da kaba kam ba ki lah ban ai ïa ki kot jingkylli.
“Ki la lum pisa lyngba ka Online Transfer sha ki Bank Account bad nangta ki phah ïa ka pisa ba la lum sha u Manish Jha,” la ong u SSP.
