Bengaluru, Jylliew:
Halor ka jingthmu jong ka Liang Pyrshah ban pyrshah ïa ka projek Bidadi, u Myntri Rangbah ka Jylla u D.K.Shivakumar u la ong ba un ym ai jubab ha kaba ïadei bad ki jingkren kiba long pyrshah ïa ki kam saiñ pyrthei. “Ha Maharashtra la pynheh ïa kawei ka shnong kaba heh 90 hajar akar bad ha Telangana ha ka 40 hajar akar, ka projek Bidadi kam dei ka projek jong nga.
Dei u HD Kumaraswamy uba la pynmih ïa katei ka jingpynbna ha ka por ba u long Myntri Rangbah ka jylla. Haba ka sorkar BJP barim ka la shim ïa ka jaka kaba heh 1000 akar bad ka la aiti sha ka KIADB, balei kine ki nongïalam ki shu sngap jar”, u la buh jingkylli bad u la kdew ruh ba ka jingshim jaka ka la jia na ka bynta ka Harohalli Industrial Area ruh kumjuh.
“Hato ki nongrep kim shym la shah pynkynriah jaka ha kata ka por,” u la kylli. U la pynskhem ba ki nongrep ki wan shakhmat ban ïakhlad noh bad ka jaka jong ki na ka bynta ka projek Bidadi. “Hynrei don ki briew kiba kwah ban leh politik halor katei ka mat”, u la bynrap.
