Bhubaneswar, Jylliew:
U Myntri Rangbahduh ka ri, u Narendra Modi, un leit jngoh shi sngi sha Odisha, ha ka 20 tarik, Jylliew na ka bynta ban ïashim bynta ha ka jingrakhe ha ka kyrdan jong ka jylla, kaba rakhe ïa ka jingdap ar snem jong ka sorkar BJP, kaba la ïalam da u Mohan Charan Majhi, Myntri Rangbah ka Jylla.
U General Secretary ka BJP, u Biranchi Narayan Tripathy, ha ka lah sngi U Blei, u la ïathuh ha ki lad pathai khubor, ba u Myntri Rangbahduh, un poi nyngkong eh ha Pahadpur ha Mayurbhanj, ha ka por kumba 11.15 baje mynstep, bad un leit sha Gosani Peetha, ka jaka mane blei kaba pawnam jong ka thaiñ, ban ai ïa ki jingduwai jong u.
Hadien kata, un leit jngoh ïa ka jaka sah jong ki kiaw bad kthaw kurim jong ka President Droupadi Murmu, ha kaba u lah ban pynlut por palat shi kynta ban ïakren bad ki bahaïing hasem bad ki nongshong shnong jong ka.
Nangta u Modi un leit sha Dandbose, ka jaka kaba don hajan Rairangpur bad ka jaka ban pynlong ïa ka jingïalang paidbah kaba la buh ban sdang naduh ka por 12.55 baje janmiet. Ka President kan ïadon bynta ruh ha kane ka prokram dap snem kaba ar jong ka sorkar.
Ha katei ka jingïalang, u Modi un kren ha ka jingïalang paidbah kaba heh bad un sa pynlong ïa ki projek pynroi kiba bun ha katei ka jingïalang.
Ka jingleit jong u Myntri Rangbahduh ka shim ïa ka jingmut namar ka wan hapdeng ka jingrakhe ïa ka jingdap ar snem jong ka sorkar jylla bad ka jingpyrkhat thymmai jong ka sorkar pdeng halor ki jingtei bad ka roi ka par jong ka jylla.
U Tripathy u la ong ba u Modi un plie bad buh ïa ki mawnongrim na ka bynta ki projek kiba shongdor da ki bun hajar klur tyngka. U la ong ba ka sorkar jylla mynta ka dang pyndep ïa ka thup jong ki projek ba kongsan ban aiti sha ki paidbah da u Myntri Rangbahduh kum shi bynta ban rakhe ïa ka jingdap snem.
Napdeng ki projek ba kongsan kiba lah ban sdang ki kynthup ïa ka projek Rameshwar-Paradip Coastal Highway kaba shongdor T.8,300 klur, kaba dang shen ka la ïoh ïa ka jingmynjur na ka kynhun Myntri ka sorkar pdeng.
La khmih lynti ba kane ka projek kan pynbha shibun ïa ka jingpynïasoh bad ki rud duriaw bad kan kyntiew ïa ki kam kamai ha ka thaiñ.
U Myntri Rangbahduh u lah ruh ban buh ïa u maw nongrim na ka bynta ka projek ba la tyrwa jong ka Bhubaneswar-Cuttack-Puri-Paradip Economic Region (BCPPER), kaba la thmu kum ka lynti ïaid ba kongsan jong ka jingroi kaba pynïasoh ïa ki jaka sor, ki karkhana bad ki kad liengsuiñ jong ka jylla.
La pynkhreh da ka NITI Aayog, kane ka plan ka thmu ban pyntreikam palat 80 tylli ki projek ha kylleng ki bynta kum ki karkhana shna nar, ka Biotechnology, ki karkhana thaiñ jaiñ, ki dawai, ka kam jngohkai pyrthei, ka pule puthi bad ka IT ryngkat bad palat 30 tylli ki jingthmu polisi ban pynshlur ïa ka jingbei tyngka, ka jingpynroi ïa ki jingtei bad ka jingthaw kam thaw jam ha ka thaiñ.
Nalor kane, la khmih lynti ruh ba katto katne ki projek surok bah jong ka ri kynthup ïa ka Capital Region Ring Road kaba jngai 111 kilomitar na Rameshwar sha Tangi ruh la khmih lynti ba yn plie paidbah ha kane ka jingleit jong u Myntri Rangbahduh.
