Vijayawada, Jylliew:
U Myntri Rangbah ka jylla Andhra Pradesh u N Chandrababu Naidu u la ong ba ka India ka nang kylla sted sha ka ri kaba khlaiñ bor ha ka liang ka ïoh ka kot ha ka pyrthei bad ka don ka bynta kaba kongsan ban pynkhih ïa ka roi ka par jong ka ri.
Haba kren ha ka jingïalang bad ki nongseng kam seng jam ba pawkhmat ha kine ki ar sngi ba la leit jong ka jingleit jong u sha Singapore, u Myntri Rangbah u la kdew ba katba ki ri kum ka China ki la shim por da ki phew snem ban ïoh ïa ka jingkiew ha ka ïoh ka kot kaba heh, ka India ka nang kiew stet bha hapoh ka jingïalam ba don jingthmu jong u Myntri Rangbahduh ka ri u Narendra Modi.
U Myntri Rangbah ka jylla u la pynpaw ïa ka jingmih jong ka India kum ka jaka shna tiar ha ka pyrthei, khamtam eh ha ka liang ka jingstad saïan, ki tiar ilektrik kiba tbit bad ki tiar karkhana kiba rem dor bha.
U la kdew ba ka India ka don ïa ka bor trei bakhlaiñ kaba bun tam ha ka pyrthei, kaba pynmih ïa ka jingmyntoi ha ka jingbun briew na ka bynta ka jingroi ka ïoh ka kot kaba neh.
U Myntri Rangbah u la pyntip sha ki nongbei tyngka ba ka Andhra Pradesh ka la dep ban pynsuk ïa ki jingmynjur sted bad ka jingai jaka na ka bynta ki projek kiba heh, kynthup ïa ka prokram Advanced Medium Combat Aircraft (AMCA) bad ka jingbei tyngka da ki kompeni pyrthei kum ka Google bad ka ArcelorMittal.
U Myntri Rangbah u la kyntu ïa ki nongbei tyngka ban pyndonkam ïa ka mariang jong ka jylla kaba ïadei bad ka jingbei tyngka bad ka jingpynheh ïa ki bynta jong ki karkhana.
