Thiruvananthapuram:
Ka kynhun Enforcement Directorate (ED) ha ka sngi Palei ka la pynlong ïa ka jingtalasi ha ki hospital bad ki jaka sah kiba bun ha kylleng ka jylla Kerala kum shi bynta jong ka jingtohkit halor ka pisa kaba ïadei bad ka jingkynnoh ban ai ïa ki dkhot met kaba pyndonkam ïa ki kot ki sla thok ban pynsuk ïa ka jingpynkylla ïa ki dkhot met ba beaiñ.
La pynlong ïa ka jingtalasi ha ki san tylli ki jaka ha Kochi, Thiruvananthapuram bad Kottayam distrik naduh dang step, la ong ki heh sorkar.
Katkum ki tyllong khubor ba la wan na ka kynhun ED, ka tnad ka la sdang ïa ka jingtohkit katkum ki katto katne ki jingujor ejahar ba la mudui da ki pulit ha ki distrik bapher bapher pyrshah ïa kawei ka kynhun ba la kynnoh ba ka donkti ban pynbeit ïa ki jingai dkhot met beaiñ ha kine ki khyndiat snem ba la dep.
Ka jingtohkit ba hashwa ka la pyni ba kiba shah kynnoh ki la leh kum ki nongpynïadei hapdeng ki nongai dkhot met, ki nongpdiang bad ki hospital, la kynnoh ba ki shim pisa kaba heh ban pynsuk ïa ka jingai sngewbha.
Da kaba pynshong nongrim ha kine ki jinglap, ka kynhun ED ka la mudui da ka mukotduma halor ka jingkamai ïa ka spah bym hok.
Ki heh sorkar ki la ïathuh ba ki jingtalasi ki dei kiba la thmu ïa ki hospital kiba la shah kynnoh ba ki don ka jingïadei ha ka kam pisa bad u snar nongïalam ha kane ka kam sniew u Najeeb. Tang ha Kochi, la pynlong ïa ki jingkhynra ha ki lai tylli ki jaka.
Ki jingwad bniah ha kajuh ka por ki la sdang ha ka por 6 baje mynstep, ha kaba ki nongtohkit ki la bishar bniah ïa ki jingpynïaid jong ki bank bad ki kot ki sla jong ki nongsumar kiba ïadei bad ki rukom ai dkhot met.
Ka jingtohkit jong ki pulit ka la lap ba ka rukom ai dkhot met ka kynthup ïa ki rukom pynshisha kiba jylliew bha kiba donkam ïa ki kot ki sla bad ki jingbit na ki pulit, ki bor shnong, ki doktor, ki MLA, bad ki MP.
La kynnoh ba kiba shah kynnoh ki pyndonkam da ki kot ki sla thok ban ïaid lait ïa kine ki rukom treikam kiba long katkum ka aiñ.
Katkum ki ejahar jong ki pulit, la ong ba katei ka kynhun runar ka la treikam naduh u bnai Nailar jong u snem 2023 bad la kynnoh ba ka la shna thok ïa ki jingthoh thok jong ki ar tylli ki hospital shimet ha Kochi, ki kot pynshisha jong ki pulit, bad ki shithi ha ka kyrteng jong ki MLA, MP, bad ki heh pulit.
Ki pulit ki la kynnoh shuh shuh ba katei ka kynhun ka la thok ïa ki shithi jingai jingmut jong ki katto katne ki doktor ba pawnam.
Ki mukotduma kiba ïadei bad katei ka kam runar, la mudui ha ki bun tylli ki distrik, namar ba la kynnoh ba ka treikam ha kylleng ka Kerala.U snar uba la shah kynnoh donkti ha kane ka kam, u dei u Najeeb, uba dei u trai shnong jong ka Kasaragod, u la shah kem ha ki pulit ha Uttar Pradesh ha u bnai ba la lah.
