Dehradun, Naitung:
Ki pulit ki la mudui mukotduma pyrshah ïa ki 19 tylli ki jaka pule ha Uttarakhand ha Haridwar distrik halor ka jingkynnoh ba ki don ki jingleh bymsuidñiew ha ka liang ka pisa tyngka bad ki jingdawa thok ha ki skhim Scholarship jong ka sorkar pdeng na ka bynta ki samla pule kiba dei ki rit paid. Ki heh sorkar ki la ong ba ka jingsuba ba la pyndonkam bakla ka lah ban poi sha ki klur tyngka.
Ïa kine ki jaka pule la lap ha ka por ba bishar bniah ïa ki aplikeshon ba la aiti ha ka National Scholarship Portal na ka bynta ki snem pule 2021-22 bad 2022-23. Ïa kane ka ejahar la ujor ha thanat SIDCUL hadien ka jingujor jong ka District Minority Welfare Ophisar ka Ipsita Rawat.
“Ki kaiphod tohkit ki pyni ïa ka jingbym beit ha ka liang ka pisa tyngka, ka jingleh thok bad ka jingsuba ba la shim kabu ïa ka pisa sorkar da ki jaka treikam kiba ïadei kam,” la ong ka Rawat ha ka jingujor jong ka, da kaba pan ïa ka jingpynngat ha ki kyndon aiñ pyrshah ïa kito kiba donkti.
Kane ka jingpyntreikam ka long hadien ka jingphah shithi da ka Union Ministry of Minority Affairs’Scholarship Division sha ka sorkar Uttarakhand ha ka 21 tarik, Lber, 2025. Ka tnad ka la pan jingtohkit kaba bniah halor ki jaka pule ba la shah ithuh ba ki long kiba la shah suba ha ka Scholarship Portal.
Hadien kata, ka Minority Welfare Department jong ka jylla ka la hukum ïa baroh ki District Magistrates ha ka 19 tarik u Jymmang, 2025, ba kin pynlong ïa ki jingtohkit bad sdang ïa ki kam katkum ka aiñ ha kano kano ka jaka ba la lap ba don ki kam beaiñ.
U majistor jong ka Haridwar distrik ha kata ka por u la thaw ïa ki komiti ba la khlieh da ki majistor sub-divisional ha ka 24 tarik, Jymmang.
Ki komiti ki la pynlong ïa ki jingtohkit bad ki la aiti ïa ki kaiphod jong ki ha u bnai Jylliew, 2025. La ïoh pdiang ïa ki kaiphod na ki majistor sub-division jong ka Bhagwanpur, Laksar, Haridwar bad Roorkee.
U Senior Superintendent of Police ka Haridwar, u Navneet Singh Bhullar u la ong ba yn thaw ïa ka kynhun tohkit kaba kyrpang hapoh jong u Circle Officer (Sadar) u S.P. Baluni.
“Ka jingtohkit jong ka tnad ka la lap kham mynshwa ïa ki jingbym ïahap ha ka liang ka pisa tyngka. Ka mukotduma ka lah ban ïadei bad ki Scholarship kiba da ki klur tyngka,” la ong u Bhullar. “Yn sa leh shuh shuh katkum ka aiñ katkum ki sakhi ba la lum ha ka por ba tohkit.”
Ki jaka pule kiba la shah pynpaw kyrteng ha kaba ïadei bad kane ka jingjia ki kynthup ïa ka God Bless Public School, Sahdevpur; M.G. Public School, Ahmedpur Grant; A.S.N. Inter College, Dheerwali, Jwalapur; Saini Private ITI, Bahadrabad; Jai Bharti Private ITI, Dhanpura; SBN Private ITI, Tikkampur; Ayurvedic Medical College and Research Centre, Mustafabad; Vishwa Bharati Public School; Madrasa Noor-e-Hasan, Haridwar; Jai Bharat PS, Bindukharak; Hannu ITI, Bhagwanpur; bad ka Radiance Academy, Nehandpur Suthari, Laksar.
Kumjuh ruh la jer kyrteng ïa ka skul Ramteerth Higher Secondary School, Rahmatpur; Roorkee Institute of Technology, Puhana; Maharshi Dayanand Private ITI, Dhanori; Sanskriti Public School, Bhauri; Phoenix School of Engineering and Business, Kanjeli Imli Khera; SDPC Girls Inter College, Roorkee; bad ka Om Institute of Education, Badheri Rajputana.
