New Delhi, Naitung:
Kum shi bynta ban nang pynkhlaiñ ban ban pynïoh ïa ka jingshngaiñ jong ki kynthei ha kylleng ka nongbah, ka sorkar Delhi ka la ïai bteng ban pyndep ha ka ban buh ïa ki 50,000 tylli ki CCTV camera kiba la hlaiñ bha ha ka rukom kaba la buh ryntih, kumba la pynbeit hashwa, ha kaba la sakhi ba kane ka jingpyntreikam ka la ïaid shakhmat.
Kane ka jingtyrwa ka long hadien ba ka sorkar ka la pynbna ha ka mang tyngka ba la dep ba ka thmu ban thaw ïa ka rukom peitngor 24×7 CCTV kaba pynleit jingmut ha ka jingshngaiñ jong ki kynthei.Ka jingmang pisa kaba nyngkong eh kaba long T.100 klur la leh hapoh ka phang ‘Ka jingshngaiñ jong ki kynthei ha Delhi’ na ka bynta u snem mang tyngka 2025-26.
Hashwa kane, ka sorkar Delhi ka la thmu ban pyndep ha ka ban buh bad ban pynbiang ïa ki CCTV kiba kham khlaiñ bor ha kylleng ki thaiñ jong ka nongbah.
Ïa kine ki jingtreikam jong ki kor ki bor la ai jingkyrshan da ki pulit ha ka ban lah ban wanrah ïa ka shongsuk shongshngaiñ, ban ïarap ha ka ban pynlong ïa ki jingtohkit, ban ïarap ha ka ban ai jingïada, ban lap ïa ki nongleh bym man kiba leh ïa kiba bun ki jait kam pyntriem.”
Ki heh ba dei khmih ki la ong ba kine ki kor ki bor kin sa ïarap ha ka ban lah ban pyntreikam stet ïa ki jingtohkit bad kumjuh ban lap bad ithuh ïa ki runar ba suba donkti ha ki kam pyntriem, ïa ki kali bad ki tiar ba ki runar ki pyndonkam khnang ban ïarap ban ïada ïa ka jingim jong kiba bun.
Katkum ka jingong jong ka PWD, la ïathuh ba ki la don palat 500 tylli ki CCTV Camera kiba khlaiñ bor ïa kiba la thmu ban buh. Ka Command Control Room kan sa shim ka jingkitkhlieh na ka bynta ban pyntreikam ïa kine ki kor ki bor bad ban ai jingtip lada donkam ban shna ne pynbha ïa ki Camera.
