Vijayawada, Naitung:
Ïa u Omicron RF.5 variant jong u khñiang jingpang SARS-CoV-2 la lap ha Andhra Pradesh hadien ka jingbud ryntih ïa ka Genome Sequencing jong ki sample kiba don ïa ka jingpang COVID-19.
La lap ïa kane ka jait jingpang hadien ba la phah saw ngut ki sample COVID-19 positive ba la lum na Kadapa distrik sha ka National Institute of Virology (NIV) Laboratory ha Pune na ka bynta ban leh ïa ka Genome Sequencing. Ka jingmih ka la pynthikna ïa ka jingdon jong u khïiang jingpang Omicron RF.5.
U Myntri ka Koit ka Khiah u Y Satya Kumar Yadav u la ïakren ïa ki jingmih na ka jingbud ryntih ba la ïoh na Pune bad bishar bniah ïa ka jingpynkhreh jong ka Jylla ïa ka COVID-19.
U Director ka Medical Education u Dr Vishnuvardhan u la ong ba ka World Health Organization (WHO) ka dang buddien ïa u RF.5 kum shi bynta jong ka prokram pahara jong ka. U la ong ba la ïathuh ha Singapore bad katto katne ki ri jong ka Southeast Asia hynrei u la ban jur ba ki sakhi kim pyni ba ka RF.5 ka buh jingma ïa ka koit ka khiah kaba kham khraw ban ïa kiwei pat.
U la ong ba ki dak ki shin kiba ïadei bad u RF.5 ki long kumjuh kumba ïohi ha kiwei pat ki sub-variant jong ka Omicron bad ki kynthup ïa ka jingpang sat ryndang, ka jingjyrhoh, ka jingshit, ka jingpang khlieh, ka jingtuid um khmut bad ka jingset ka khmat, ka jingtlot bad ka jingpang ka met. Ka tnad ka Koit ka Khiah ka la ong ba ka AP ka long kaba la pynkhreh ban ïakhun ïa kino kino ki nongpang Covid.
