New Delhi, Naitung:
Ki nongïalam jong ka seng Congress, kiba kynthup ïa u Rahul Gandhi bad u Mallikarjun Kharge, ha ka sngi U Blei, ki la kyntu ïa u Myntri Rangbahduh u Narendra Modi, ba un bthah ban pynlong ïa ka jingtohkit halor ka jingkynnoh bamsap na u synñiang ha ka temple jong ka Ayodhya Ram. Ha ka shithi ba la thoh lang sha u Modi, ki la ong ba da ki lak ngut ki nongmane kiba la noh synñiang ïa ka kamai kaba ki la kamai shitom da ka jingngeit ki sngew ba la “shah shet kylla ïa ki da ka jingtuh”.
Ki nongïalam ka liang pyrshah ha baroh ar tylli ki ïingdorbar jong ka Parliament ki la ong ba ka jingsngap jar jong u Myntri Rangbahduh halor katei ka mat kam long kaba lah ban pdiang, bad ki la kyntu ïa u ban pynthikna ïa ka jingkitkhlieh bad ka jingsiew bailutksan.
“Ka shithi ba la thoh lang jong ngi sha u Modi ka dawa ïa ka jingtohkit kaba laitluid bad kaba bniah halor ki kam pisa tyngka jong ka Shri Ram Janmabhoomi Teerth Kshetra Trust. Da ki lak ngut ki riewngeit kiba la nohsynñiang ïa ka umsyep jong ki, da ka jingngeit, ka jinglong shida bad ki jingshaniah ki la sngew ba ki la shah shet kylla da ka jingshah tuh,” la ong u Kharge ha ka jingthoh kaba la buh ha ka rynsan X, ha ka jingthoh ha ka shithi.
Ka jingkynnoh ba la tuh ïa ki jingai sngewbha ba la tyrwa ha ka temple Ram ka la paw ha ka taïew ba nyngkong jong u bnai Jylliew bad haduh mynta ka la pynlong ïa ka jingshah kem jong ki 8 ngut bad ka jingiehnohkam jong ki arngut ki heh nongpynïaid na ka Trust.
U President ka AICC u Mallikarjun Kharge (L) bad u Lop Lok Sabha u Rahul Gandhi. Ha ka 25 tarik, Jylliew ki pulit ki la ujor ejahar halor kane ka kam halor ka jingujor jong ka Trust bad ki la kem ïa 8 ngut ki rangbah.
Ha ka shithi jong ki, baroh arngut u Gandhi bad u Kharge, ki la ïathuh ha u Myntri Rangbahduh ba u la pynbna ïa ka jingthaw ïa ka Trust ha Parliament halor ka jingbthah jong ka Supreme Court, hynrei ïa ki dkhot jong ka la thung tang da ka sorkar jong u.
Ka dei ka jingtip paidbah ba ki dkhot jong ka Trust ki don ka jingïadei bad ka RSS, VHP bad ki kynhun ba ïatreilang jong ka, la ong ki nongïalam ka Congress da kaba bynrap ba u General Secretary barim ka Trust ruh u dei u paralok ba jan jong u.
