Bengaluru, Naitung:
Ki heh nongpynïaid na ka bynta ka jingpyntreikam ïa ka projek Sharavathi Pumped Storage Project kaba 2,000 megawatt ha Shivamogga bad Uttara Kannada distrik ki la leit jurip ïa ki jaka ba la dei ban pyntreikam.
Kumba la khmih lynti, la ong ba kane ka projek kan wanrah ïa ka jingpom ïa kumba 10,000 tylli ki dieng. Hynrei kane ka duna ïa ka jingkheiñ tynrai kaba long 16,041 tylli ki dieng.
Haba jubab ïa ka jingkylli kaba khlem jied na u MLC u Dr Dhananjaya Sarji hapoh ka Council dang shen, u Myntri ka tnad bor ding u KJ George u la ong ba ïa kane ka projek yn pyntreikam ha ka jinglut kaba la antad kumba T.10,240 klur. Kane ka projek kan buh ïa ka bording kaba 12 million unit ha ka shisngi.
U la kam ba kan don ka jingpynthut shipor ïa ka khlaw, hynrei u la pynskhem ba ka jingktah ïa ka mariang baroh kawei kan long kaba duna. Kane ka rukom kan ailad ïa ka jylla ban buh ïa ka bording kaba palat ha ki por ba ym don bording bad ban pyllait ïa ka haba ka jingdawa ka jur bha, u la bynrap.
Kane ka projek kan pyndonkam ïa ka dam Talakalale kaba la don lypa kum ka jaka buh um shaneng bad ka dam Gerusoppa kaba don ha Sharavathi Valley kum ka jaka buh um kaba shapoh.
Ka tnad bording jong ka sorkar pdeng ka la mynjur ïa ka kaiphod ba bniah jong ka projek ha u snem ba la dep, bad la buh por ban pyndep ïa kane ka projek hadien san snem.
Hadien ba la dep kane ka projek yn aiti sha ka tnad khlaw ban thung khlaw 54.15 hectare ka jaka khajna. Ka jingthaw ïa ka jingtap kaba jyrngam bad ki lynti iaid jong ki mrad, kumba la ai jingmut da ka tnad khlaw, yn shim ha ka por ba pyntreikam ban ïada ïa ki mrad khlaw kiba la jan duh jait, u la bynrap.
Kane ka projek ka donkam ïa ka jaka kaba heh 100.64 hectare, kaba kynthup ïa 54.15 hectare ka jaka khlaw bad 46.49 hectare ka jaka bym dei khlaw. U George u la ong ba kane ka projek kan ym pynkylla ïa ka jingtuid jong ka wah bad lane kan pynthut ïa ki jingtei kiba la don lypa, kum ki lynti pynpoi bording, ki ophis Colony bad ki surok.
