Srinagar, Naitung:
Ka Jammu and Kashmir ka dang don ha ka jingkhmih bniah bad ka jinglong adkar hadien ba u slap ba khlem sangeh u la wanrah ïa ka jingshlei um, ka jingtwa khyndew bad ki jinghap jong ki maw ha kylleng ka Union Territory, kaba la shim ïa 14 ngut ki mynsiem briew ha kine ki ar sngi ba la dep.
Ka India Meteorological Department (MeT) ka la ïathuh lypa ha kaba ïadei bad ka jinghap jong u slap uba jur thaduh ka 23 tarik, Naitung, ha kaba kane ka la pynlong ïa ki heh ba dei khmih ba kin pynsangeh shwa ïa ka Shri Amarnath Yatra ha ka sngi kaba ar lynter bad pynjur ïa ka jingpynkhreh ba kyrkieh ha kylleng ka thaiñ.
Kumba la antad da ka MeT, ka jingjur jong u slap ka la pynlong ïa ka jinglang bad shlei jong ka um ha baroh ar ki jaka ba don ha sor bad ha sor.
Ki jaka kiba la shah ktah jur ki dei ki jaka ba kynthup ïa ka Khanyar, Nowhatta, Babademb, Safa Kadal, Rajouri Kadal bad Eidgah.
Ki surok heh kum ka MA Road, Residency Road, Lal Chowk, Boulevard Road bad Alijan Road, ha ryngkat ki jaka ba marjan kiba kynthupo ïa ka Batamaloo, Hazratbal bad Bagh-e-Mehtab, ki la sakhi ïa ka jingjur jong ka jingshlei um.
Ki nongshong shnong ki la kynthoh ïa ka Smart City Mission, da kaba ong ba ki jingtei ba kongsan jong ka nongbah ki la pulom hadien ba u slap u la hap tang katto katne kynta.
Bun ki la pynpaw ïa ka jingsngewkhia ba ka jingbteng jong u slap ka lah ban pynjur ïa ka jingshlei um.
