Bhubaneswar, Naitung:
Katkum ka jingïathuh ka tyllong khubor, la ong ba ka jingïap jong ki briew ha ka jingjia ba la jia ha Puri Rath Yatra, ka la kiew sha ka lai ngut, ha kaba ka sorkar jylla, ha ka lah sngi U Blei, ka la pynshisha ïa ka jingïap jong uwei u trai shnong na Mumbai, ha ka por ba u dang tan ïa ka kali kulai ha ka 16 tarik, Naitung.
Ka sorkar kham hashwa, ka la pynthikna ba ki don arngut kiba la khlad noh, kynthup ïa uwei u briew uba 60 snem ka rta, uba “ym pat lah ban ithuh” ïa uba la pynshisha ba u la ïap na ka daw jong ka jingset mynsiem, bad uwei pat ïa uba la tip kyrteng kum u Anil Das na Cuttack, uba la shah ktah na ka jingthut treikam u klongsnam.
Ka sorkar ka la pynshong nongrim ïa baroh arngut ki jingïap na ka jingbun briew kynsan kynsan ym na ka jingshahïuh para briew.
Ka ophis treikam jong u Myntri Rangbah, ka ïathuh ba uba lai napdeng kine kiba la ïap ïa uba la tip kyrteng kum u Ashok Subare Raikar na Mumbai u la kem pang ha ka Rath Yatra bad u la khlad noh katba u dang shah sumar ha Puri district headquarter hospital ha ka 16 tarik, Naitung.
U Myntri Rangbah ka Jylla, u Mohan Charan Majhi, ha katei ka sngi, u la pynbna ïa ka jingai jingïarap pisa kaba mar T. 10 lak na ka Chief Minister’s Relief Fund (CMRF) na ka bynta kiba haïing hasem jong u Das bad u Raikar.
Haba pynpaw ïa ka jingsngewsih kaba khraw halor kitei ki briew kiba la khlad noh, u Myntri Rangbah u la pynpaw ïa ka jingsngewlem sha ki longïing kiba la duh noh ïa ki baïeid bathoiñ jong ki bad duwai ruh na ka bynta ka jingsuk bymjukut jong ki mynsiem kiba la khlad noh.
Ha kajuh ka por, ka BJD ka la kynthoh jur ïa ka sorkar BJP da kaba kynnoh ba ka la ïalam bakla ïa ki paidbah da kaba kam ba kam shym la don kano kano ka jingïaïuh para briew ba pynlong ïa ka Yatra. Ka la dawa ïa ka jingtohkit jong ka aiñ halor kane ka kam ban pynmih ïa ka jingshisha.
Haba ai jingkren ha ka jingïalang bad ki nongthoh khubor hangne, u Vice president ka BJD uba dei ruh u myntri barim u Sanjay Das Burma ryngkat u nongaiktien u Lenin Mohanty ki la kynnoh ba u Myntri ka tnad ka koit ka khiah u Mukesh Mahaling u la thok haba u la ong ba kam shym la don kano kano ka jingïaïuh para briew ha ka por ba la pynlong ïa ka Rath Yatra.
Ki nongïalam ka BJD ki la kynnoh ba ka sorkar jylla ka pyrshang katba lah ban pynduhjait ïa katei ka jingjia.
Ki la kynnoh ba saw ngut ki briew kiba mynsaw jur ki la shah sumar ha Puri district headquarter hospital, ha kaba lai ngut ki la ïap hynrei ka sorkar ka la buhrieh ïa ki jingshisha halor ka jingïap jong u briew uba lai.
Da kaba kynnoh ba don ka jingpynïaid bakla kaba jur ha ka jingpynïaid ïa ka Rath Yatra ha kine ki ar snem ba la dep, ki nongïalam ka BJD ki la dawa ban tohkit ïa ki jingbakla kiba jur ha ka jingpynïaid ïa ka Yatra.
Ki la pan ruh ban pyllait ïa ki kaiphod jingtohkit kiba ïadei bad ki Rath Yatra ba la dep, kynthup ïa ki jingïap briew ha ka jingïatyngkhuh bad ka jingjia ha kaba u Lord Balabhadra u la lympat na ka Charamal ha ka por ba ïaid paidbah Pahandi ha ka temple Gundicha.
Ki nongïalam ka BJD ki la buh jingkylli ruh kumno la tan ïa ki kali kulai hadien ba la sep ka sngi watla ym don kano kano ka rukom niam ne jingleh niam kaba ailad ïa kane.
Ki la dawa na ka sorkar jylla ba ka dei ban pynshai balei ym shym la bud ïa ki riti dustur ba la buh.
