New Delhi, Naitung:
Ki la don palat 118 ngut ki pulit, kynthup ïa ki katto katne ki heh ophisar, ki la mynsaw bad kumba 70 ngut ki nongïakhih, ki la shah kem ha ka lah sngi U Blei, namar ba ka jingïaid paidbah jong ka Cockroach Janta Party (CJP) “Sansad Chalo” ka la wanrah ïa ka jingïakynad kaba shyrkhei ha ka thaiñ New Delhi, ong ki pulit.
Ki pulit jong ka Delhi, ki la pynmih ïa ka kyrwoh, kaba kdew ïa kine ki jingkheiñ bad ïa ka jingkheiñ jong ki, da kaba kynnoh ïa ki nongïakhih, ba ki pyni ïa ka “jinglong bym don akor, kaba leh donbor bad kaba wanrah ïa ka jingthombor” ha ka por ba ki ïakhih bad thombor ïa ki bor pahara, pynjulor ïa ki kali sorkar bad ki jingdon jingem jong ki paidbah.
Ki pulit ki la ïathuh ba palat 118 ngut ki pulit ki la mynsaw ha kane ka jingïakynad, kynthup ïa ki ophisar ba kham heh jong ka kyrdan Special Commissioner of Police, Joint Commissioner of Police, Additional Commissioner of Police, Deputy Commissioner of Police, Additional Deputy Commissioner of Police bad u Assistant Commissioner of Police, nalor ki katto katne ngut ki pulit kynthei.
