New Delhi, Naitung:
Ki 20 ngut ki MP jong ka seng TMC kiba pyrshah bad kiba la phet noh na ka seng la khmih lynti ba kin sdang ban ïashim bynta ha ki jingïalang jong ka NDA naduh ka sngi Ba-ar jong ka taïew ban wan, la ïathuh ki tyllong khubor.
Kane ka jingjia ka la jia katto katne sngi hadien ba 20 ngut na ki 28 ngut ki MP jong ka Lok Sabha jong ka seng TMC ki la ïakhih pyrshah ïa ki nongïalam jong ka seng hadien ba ka la shah rem ha ka elekshon sha ka Ïingdorbar Thawaiñ jong ka West Bengal bad ki la pynïasoh noh sha ka Nationalist Citizens Party of India (NCPI), ka seng saiñpyrthei kaba la pynrung kyrteng hynrei kaba khlem pat shah ithuh kaba don ha Howrah.
Ki MP pyrshah seng jong ka TMC ki la aiti ïa ka dorkhas sha u Lamphang ka ïingdorbar ban pan jingithuh ïa ka jingïasoh jong ki bad ka NCPI.
“Ka dorkhas jong ngi shaphang ka jingpynïasoh bad ka NCPI ka dang sahkut ha u Lamphang bad ngi kyrmen ba yn sa shim ïa ka rai shen”, la ong uwei u nongïalam ka seng.
Kane ka jingpynbeit thymmai ïa ka saiñ hima sima ka la paw ha ka jingïalang jong baroh ki seng kumba ju long, kaba la khot shwa ka dorbar Lyiur, ha kaba ki MP ba pyrshah ka seng TMC; kiba kynthup ïa u Sudip Bandyopadhyay bad u Kakoli Ghosh Dastidar, ki la ïashim bynta hadien ba la khot sngewbha ïa ki da u Kiren Rijiju, Myntri ka Parliamentary Affairs.
Ka jingdon jong ki ka la pynlong ïa ki seng pyrshah ban pynlong ïa ka jingïakhih kum ka dak shwa ban leit phai biang sha ka jingïalang.
Lada ithuh da u Lamphang, katei ka kynhun kaba la ïakhlad noh kan pyni ïa ka jingkhlad noh kaba khraw tam ha ka histori jong ka seng TMC bad kin ïasoh bad ka NDA kum ka NCPI. Lym kumta kin hap ban leit sha ka jingïalang kum ki kynhun ba pyrshah ïa ka seng TMC.
Ka jingkhmih lynti ba ki MP ba pyrshah kin ïashim bynta ha ki jingïalang jong ka NDA naduh ka taïew ban wan, ka lah ban pynjur shuh shuh ïa ka jingeh ha ka saiñ hima sima hapoh ka TMC bad ban pynwan dur thymmai ïa ki jingpynbiang bad ka jingïahap jingmut jong ka ïing dorbar ha ka por ba don ka jingïalang.
