New Delhi, Naitung:
Ki pulit jong ka Delhi, ki la ithuh ïa ki 2,873 ngut ki briew, kiba dondak ha ki kam runar, kiba la leit jngoh ïa ka jaka ïakhih jong ki samla pule ha Jantar Mantar, hapdeng ka 20 tarik, Naitung bad 25tarik Naitung, ong u heh pulit ha ka lah sngi U Blei.
Katkum ka jingong jong ki pulit, la ithuh ïa kine ki briew da kaba pyndonkam ïa ka Delhi Police’s Facial Recognition System (FRS) ha ryngkat ka jingpyndonkam ïa ki kor khmih bniah.
Kiba bun na kiba la lap ki dei kiba la lap na ki jaka jong ka North-East Delhi kum ha Seelampur, Chand Bagh bad Jafrabad, kumjuh ruh ha ki thaiñ South-East Delhi ba kynthup ïa ka Jamia Nagar, Shaheen Bagh bad Okhla.
Na ka liang jong ki pulit ki dang tohkit la ki don ne em napdeng kine ki briew kiba donkti ha kane ka jingïakynad kaba la jia ha Jantar Mantar bad kiwei kiwei ki bynta jong ka nongbah New Delhi ha ka 20 tarik, Naitung.
U heh sorkar u la ong ba ïa ki briew ba la ithuh la pynngat ha ki mukotduma kiba jur bha, kynthup ïa ka jingpynïap briew, ha ki kam thombor pyrshah ïa ka longryngïeng, ki kam runar kiba shah pynngat hapoh ka Protection of Children from Sexual Offences (POCSO) Act, ki jingrah bor bad ki jingtuh jingthiem.
“Ki don napdeng kine ki nongleh kam sniew kiba la shah kynnoh ba ki la wan biang sha ka jaka ïakhih jong ka Cockroach Janata Party man ka por. Kine ki nongleh kam sniew ki don ïa ki kam runar kiba shyrkhei kiba la mudui pyrshah ïa ki,” ong une u heh pulit.
Katkum ka jingong jong ki pulit, ym duna ïa ka 989 ngut na ki 2,873 ngut ki briew kiba donkti ha ki kam runar la suba ba ki donkti ha ki kam runar kiba shyrkhei.
Ka jingpyndonkam jong ki pulit ka Delhi ïa ka Facial Recognition System ka long da kaba buh da ki camera ha ki jaka rung bad jaka mih jong ka jaka ba don ka jingïakhih ha Jantar Mantar, bad kumjuh ha ki jaka ha kylleng ka nongbah, kynthup ïa ki jaka rung khappud.
Ïa kine ki camera la buh ban buddien ïa ka jingïakhih bad ban khanglad ïa ki riew pyrshah ïa ka imlang sahlang ban pynmih ïa ki jingkulmar hapoh ka jingmaham ba ki ïashim bynta ha ka jingïakhih jong ki samla pule, la ong u heh sorkar.
Ki dur ba la shim da ki camera jong ka FRS, la pynïadei bad ka thup jingtip jong ki pulit jong ka Delhi, kaba don ïa ki jingthoh jong ki nongleh kam sniew, ki nongphetwir, ki nongthoh histori bad ki Bad Characters (BC) ba la pynneh pynsah da ki thanat pulit ha kylleng ka nongbah.
Ka jingdon jong ki briew kiba bun kiba don ki rekod leh kam sniew ha katei ka jingïakhih ka la pynmih ïa ka jingsuba hapdeng ki nongtohkit ba ki lah ban long kiba la thmu ban phah ne pynkhih ban pynthut ïa ka suk ka saiñ.
Ki pulit ki dang eksamin ruh la ki don ne em kiba la shah pynshoi ha ki nongpynïaid social media kiba don ha Pakistan kiba la shah kynnoh ba ki pynsaphriang ïa ki jingtip kiba bakla shaphang ki bor pahara ha ka nongbah jong ka ri, la bynrap shuh shuh ka tyllong khubor.
