Ranchi, Naitung:
Kum shi bynta jong ka jingjop ha ka jingïakhun pyrshah ïa ki lehnoh Maoist kaba dang ïaid shakhmat, ki bor pahara ha Jharkhand ki la sakhi sa kawei pat ka jingjop kaba khraw namar ba 24 ngut ki dkhot ka CPI (Maoist) ki la pynkhreh ban aiti noh bad ban ïasoh bad ka kynhun ha ka imlang-sahlang.
Napdeng kine, 16 ngut ki Maoist na Jharkhand ki la leit ban pyndem bad 8 ngut na ka jylla ba marjan jong ka Chhattisgarh ki don ha ka jingpynkhreh haduh ba la thoh ïa ka khubor.
Kane ka jingpyndem ka la long ha ka por 11:00 baje mynstep ha ka sngi Ba-ar ha ka ophis jong ki pulit jong ka Jharkhand ha Ranchi, ha ka jingdon lang u Director General of Police (DGP), kaba long sa kawei pat ka jingshah pynphaidien na ka bynta kane ka kynhun ba la shah ñiew beaiñ.
Kiba wanphai biang bad kiba la thmu ban phai sha ka lynti kaba bha ki kynthup ïa ki Maoist kiba la bat ïa ki kam kiba kongsan hapoh ka seng. Katei ka kynhun ka kynthup ïa uwei u Regional Committee Member (RCM), saw ngut ki Zonal Committee Member (ZCM), lai ngut na Jharkhand bad uwei na Chhattisgarh, lai ngut ki Sub-Zonal Committee Member (SZCM), shi ngut ki Area Committee Member (ACM), hynriew ngut na Jharkhand bad saw ngut na Chhattisgarh bad hynriew ngut na Chhattisgarh.
Ki Maoist kiba la pyndem wait ki kynthup ïa u RCM Santosh (ba la tip ruh da ka kyrteng kum u Basudev Da, Gandhi), uba la shah thong ha ka khlieh jong u da T. 15 lak, ha ryngkat u Chandan Lohra (uba la shah thong T. 10 lak) bad u Anil Turi bad u Sukhlal Birjia da T.5 lak ha ka khlieh jong ki.
Nalor kata, u Sudesh Honhaga (ba la tip kum u Sonaram bad kum u Sona), uba la kit ha ka khlieh jong u da T.2 lak tyngka, u la rai ruh ban aiti noh ïa ki tiar ïaleh jong u bad ban leit phai biang sha ka jingim ba bha.
Katkum ki khubor, la ïathuh ba ka jingdon jong ki lehnoh Naxal ha Jharkhand, mynta ka long kaba bun eh tang ha ka khlaw Saranda kaba don ha West Singhbhum.
Kiwei pat ki Maoist kiba la pyndem wait ki kynthup ïa u Santosh Manjhi (ba la tip kum u Jagbandhu), u Jaykant Munda (kum u Gunga bad Bengali), u Rajnath Hansda (ba la tip ruh kum u Guna Hansda), u Etwari Manjhi (kum u Sonot, Sant, Shanicharva), Devan Murmu (kum u Shanichar), Sumitra Surin, Champa Manjhiain (kum u Gudiya; dkhot ka Santhal), Salemi Munda (kum u Parul), Munni Surin (kum u Murin Surin) bad ka Sita Munda.
Katkum ka khubor ba la wan na ki pulit, la ong ba ki Maoist kiba la leit pyndem wait ki la aiti bun bha ki tiar ïaleh. Kine ki kynthup ïa baroh 11 tylli ki tiar ïaleh kiba mynta, kiba kynthup ïa 6 tylli ki suloi INSAS, ar tylli ki AK-47, kawei ka suloi HK-33, kawei ka US carbine bad kawei ka suloi M-16.
Nalor kata, la aiti sha ki pulit 38 tylli ki Magazines bad 1,562 tylli ki kuli bym pat pyndonkam. Ki pulit ki shim ïa kane kum ka jingmih kaba kongsan na ka jingtreikam kaba dang iaid shakhmat bad ka jingtlot jong ka network jong ka seng Naxal.
Katkum ki khubor, ka jingdon jong ki lehnoh Naxal ha Jharkhand mynta ka la sahkut ha ka khlaw Saranda ha West Singhbhum.Ki bor pahara ki dang pynlong ïa ki jingkhynra ba dang ïai bteng hangne, kaba la pynduna shibun ïa ki kam jong ki lehnoh Maoist.
Kham hashwa, ha ka 21 tarik, Jymmang, 25 ngut ki lehnoh CPI (Maoist) bad arngut ki lehnoh JJMP ki la leit pyndem wait hakhmat ki heh ophisar ha ktem pulit. Kane ka kynhun ka dei kaba trei shitom bha ha ki thaiñ Kolhan bad West Singhbhum bad ka dei kaba la pynïasoh bad ka kynhun jong u Misir Besra, u Maoist uba la shah thong ha ka khlieh jong u da T. 1klur.
Ki Maoist kiba la aiti noh ha katei ka por ki kit ha ka khlieh jong ki ba la lum lang baroh T. 33 lak. Kine ki jingaiti noh kiba bud ryntih ki pyni shai ïa ka jinghiar ka jinglong hapoh ka seng.
Katba ki dkhot jong ka Central Committee, u Misir Besra bad u Asim Mandal, ki la shah thong ha ka khlieh jong ki da mar T. 1 klur, kine ki dang pynlong jaka rieh ha ka khlaw Saranda.
Ki bor pahara ki pynleit jingmut nyngkong eh ban kem ïa kine ki arngut ki nongïalam bahakhlieh duh jong ka Maoist lane ban pynthikna ïa ka jingaiti noh jong ki.
Watla ki la shah pyndik ha ki por ba ïakynduh ha ki katto katne ki khep, hynrei ki la lah ban phet krad man ka por da kaba pynkylla ïa ki jaka rieh jong ki.
