Patna, Naitung:
Ka sorkar Bihar ha ka lah sngi U Blei, ka la pynbna ba kan weng noh ïa baroh ki mukotduma ba la mudui pyrshah ïa ki nongïakhih ha kaba ïadei bad ki jingïakhih NEET-UG ha baroh kawei ka jylla, da kaba pynthikna ba yn ym leh ei ei shuh pyrshah ïa ki.
Ka kyrwoh ba la pynmih da ka tnad ki kam pohïing jong ka jylla ka la ong, “Ym don kano kano ka jingtreikam da ka aiñ kaba sniew /ban pynshitom beiñ da ka sorkar pyrshah ïa kino kino ki briew kiba ïashim bynta ha ki jingïakhih shwa ka por 6 baje janmiet jong ka 26 tarik u Naitung, ha kylleng ka jylla. Kumjuh ruh ka jingtreikam ka aiñ na ka bynta ban weng noh ïa baroh ki jingujor ejahar, ki jingmudui ne ki shithi maham ban kem briew, hashwa ka 6 baje jamiet jong ka 26 tarik, Naitung ha kaba ïadei bad ka jingïashim bynta ha ki jingïakhih ba la kdew, kan sdang noh mardor.”
Ka kyrwoh ba la pynmih da u Kshatranil Singh, Special Secretary, Home Department, ka ong ba baroh ki briew kiba la shah kem/shah set ha kaba ïadei bad ki jingjia ba la mudui shwa ka por 6 baje janmiet jong ka 26 tarik Naitung., kin pyllait noh mardor.
Ha baroh kine ki mukotduma ba la mudui shwa ka por 6 baje janmiet jong ka 26 tarik u Naitung, yn ym leh ei ei, beit beit ne khlem beit, pyrshah ïa kum kine ki briew ha ki por ban wan ruh kumjuh, u la bynrap.
Ki jingïakhih kiba heh ki la mih ha kylleng ki bynta jong ka Bihar hadien ba ki pulit ka Delhi ki la pyndonkam da ka bor ban pynpra ïa ki nongïakhih hajan Jantar Mantar ha ka 20 tarik, Naitung.
Ki pulit ka Bihar ki la kem ïa 355 ngut ki briew bad phah ïa ki sha phatok hadien ka jingïakynad bad jingïakhih kaba la saphriang kylleng ka jylla ha kaba ïadei bad ka Bihar bandh kaba la long ha ka 25 tarik, Naitung.
Arngut ki SP bad arngut ki DSP ki dei napdeng ki 91 ngut ki pulit kiba la mynsaw ha ka jingshah kawang maw ha ki nongkyrshan ïakhih ha ka 25tarik, Naitung, katto katne ngut ki Ophisar jong ka Station House, kynthup ïa u jong ka Gandhi Maidan police Station ha Patna, ki la mynsaw na ka khlieh jong ki ha ki jingïakhih.
Ki pulit ki la ïathuh ba ki jingïakhih ki la wanrah ïa ka jingpynthut kaba jur ha ki katto katne ki distrik. Kane ka jingïakynad ka la wanrah ïa ka jingjulor jong ki 14 tylli ki kali sorkar, katba kawei ka kali ka la shah thang.
Ki pulit ki la pyntip ruh ba ki don 13 ngut ki riew paidbah kiba la mynsaw ha kane ka jingkulmar. Ha Saran distrik, u Block Development Officer (BDO) jong ka Sadar Block u la mynsaw jur bha.
Katkum ka jingïathuh jong ki pulit, une u briew u la duh noh ïa ka jingïohi na kawei ka khmat bad u dang shah sumar ha Indira Gandhi Institute of Medical Sciences (IGIMS). Nalor kane, u BDO ka Revelganj ruh u la mynsaw jur ha ka jingshah thombor ba la kynnoh ba u la ap jingma ïa ka jingim jong u, ha kaba u la mynsaw jur na ka khlieh bad u la shah sumar ha Medanta Hospital. Baroh arngut ki ophisar ki dang don hapoh ka jingsumar.
Katkum ka kyrwoh ba la pyllait da ka tnad pulit jong ka Bihar ha ka lah sngi U Blei, la ïathuh ba ki don 694 ngut ki briew kiba la shah kem ha baroh kawei ka jylla. Hadien ka jingpynshisha, la pyllait noh ïa 339 ngut ki khynnah rit bad ki samla pule, katba 355 ngut ki briew kiba la kynnoh ba ki donkti ha ki kam thombor la ïalam hakhmat ka ïingbishar bad la set ïa ki ha phatok.
Ki nongïakhih ki la kawang maw, thang ïa ki kali bad pynjulor ïa ki jingdon jingem jong ki paidbah. Ha kane ka jingjia da ki phew ngut ki pulit ba kynthup ïa arngut ki Superintendent of Police (SP) ki la mynsaw.
La mih ruh ki dur jong ki pulit kiba siat da ka AK-47 ha Siwan. Ka heh pulit jong ka jylla ka la pynmih ruh ïa ka jingpynshai ha kaba ïadei bad ka jingpynbna ba la don ka jingsiat AK-47 ha Siwan.
Ki pulit ki la ïathuh ba ha ka 25 tarik, Naitung, hajan ka JP Chowk, u Constable Abhishek Kumar u la siat saw kuli ha suiñ hadien ba u la shah ker sawdong ha ki nongïakhih, da kaba kam ba katei ka jingleh ka long ban ïada ïa ki jingdon jingem jong ka sorkar bad ki briew jong ki pulit. Ki pulit ki la pynskhem ba ym shym la don uwei ruh u nongïakhih uba la mynsaw ha katei ka jingsiat sha suiñ.
Hynrei ïa u Constable Abhishek Kumar la sospon noh mardor, bad la sdang ïa ka jingpynshitom jong ka tnad pyrshah ïa u.
La mudui da ka ejahar ha Siwan Town police station katkum ka jingïathuh jong ki lai ngut ki samla kiba la mynsaw, kiba kynthup ïa u Mohd. Arif, u Akash Kumar, bad u Bullet Kumar Gaur. Katkum ka jingïathuh jong ki pulit, kitei ki lai ngut ki la mynsaw ha ki jaka bapher bapher kiba jngai kumba 1.5 haduh 2 kilomitar na JP Chowk, ha kaba la jia katei ka jingsiat.
Ki doktor ki la ïathuh ba baroh lai ngut ki la lait na ka jingma, bad u Mohd. Arif naduh katei ka por u la mih noh na Medanta Hospital. U heh pulit ka Siwan, u Puran Kumar Jha u la ong ba ka jingtohkit kaba nyngkong kam shym la lah satia ban pynshisha ba don mano mano ba mynsaw na ka jingshah siat da ka AK-47. U la bynrap ba ka kynhun District Intelligence Unit (DIU) ka la leit sha katei ka thaiñ katba ka dang tohkit ïa ka jingïap briew kaba la jia ha katei ka step.
Ka jingtohkit lang mynta ka dang ïaid hapoh ka jingpeit jong u Commissioner bad u Deputy Inspector General (DIG), bad ka kaiphod jingtohkit ka dang sahteng.
