New Delhi, Naitung:
Ka Supreme Court ha ka sngi Ba-ar ka la bthah ban pyllait noh ïa ki samla pule kiba ïakhih kiba dang hapoh 18 snem ka rta bad ki bym don kano kano ka jingshah pynngat ha ki kam runar, bad ka la kyrpad ïa ki bor pynïaid ban pynneh pynsah ïa ki sakhi electronic bad digital kiba ïadei bad ka jingkhihwin kaba dang shen ha ka ri baroh kawei halor ka jinglait tuh ki jingkylli jong ka NEET.
Ka ïingbishar ba la khlieh da u Chief Justice jong ka ri India ka Surya Kant ka la ïohi ba ki jingkynnoh ba ki pulit ki leh palat ïa ki samla ki pynlong ïa ka jingtohkit kaba hok bad kaba laitluid.
Haba sngap ïa ka kynhun jong ki jingujor kiba kynnoh ïa ka jingleh tohmet jong ki pulit ha ka por ba don ki jingïakhih, ka ïingbishar bahakhlieh duh ka la pynmih ïa shibun ki jingbthah ba shipor.
Ka kynhun nongbishar, kaba kynthup ruh ïa ki Justice Joymalya Bagchi bad ka V Mohana, ka la bthah ïa baroh ki jylla ba la pynlong ïa ki jingïakhih ba kin pynneh pynsah ïa ki dur CCTV, ki dur ba la ring dur da ki drone, ki dur ba la ring dur da ki body-camera, ki jingthoh ba la shon da ki wireless communication, ki PCR logs bad kiwei kiwei ki sakhi digital kiba ïadei bad ki jingïakhih.
Ka la hukum ruh ba kino kino ki jingtip digital ba la lum halor ki nongïakhih dei ban pynneh pynsah hynrei ym dei ban wanrah ne pyni paidbah.
Ka kynhun nongbishar ka la khanglad ïa ki bor synshar ban shim ïa kano kano ka sienjam pynbor pyrshah ïa ki samla pule kiba pyrshah, da kaba ong ba ka jingïada kan ym ktah ïa ki briew kiba don ïa ki kam runar.
Ka kynhun nongbishar ka la ailad ïa ka sorkar Delhi ban bteng ïa ka jingtohkit halor ki ejahar ba la rejistar hynrei ka la ong ba ym dei ban leh ïa kano kano ka jingleh pynbor pyrshah ïa ki samla pule kiba dei hok ban ïakhih ha ka por ba dang sahteng ka jingbishar.
Ka kynhun nongbishar ka la pan jubab ruh na ki Chief Secretary jong ka Delhi, Maharashtra, Bihar, Kerala, Madhya Pradesh bad Uttar Pradesh halor ki jingkynnoh ba la pynpaw ha ki dorkhas.
“Ki jingkynnoh ki dawa ban pyrkhat ïa ka jingtohkit kaba hok bad kaba laitluid, kaba dei ruh ban pynbeit ïa ki jingeh jong ki bahaïing jong palat 200 ngut ki pulit kiba la mynsaw,” la ong u CJI.
Ka kynhun nongbishar ka la ong ba la bthah ïa ka sorkar pdeng bad ki jylla ha kaba ïadei ban buh ïa ki jingthoh jong ki ha ka rekod shwa ba kan pyrkhat ban thaw ïa ka komiti ba laitluid ne ka Special Investigation Team (SIT) ban pynthikna ïa ka jingtohkit kaba hok, kaba shai bad kaba bniah ïa baroh ki jingjia jong ka jingshah thombor ha ka por ba pynlong ïa ki jingïakhih.
Ha kaba sdang, ka ïingbishar ka la kylli balei ba ym dei ban don ka jingtohkit kaba laitluid halor ki jingkynnoh ba ki pulit ki leh palat pud.
“Kino kino kiba leh palat pud, kiba shim ïa ka aiñ ha ki kti jong ki, dei ban leh ei ei ïa ki,” la ong ka kynhun nongbishar.
