Bhopal, Naitung:
Katkum ka jingïathuh ka tyllong khubor, la ong ba uwei u dkhot jong ka seng Congress, uba 36 snem ka rta, ula shah shoh ha ka kynhun ki briew ha Rewa distrik jong ka Madhya Pradesh, ong ka khubor pulit ha ka sngi Balang.
Kane ka jingjia ka la jia hajan kawei ka Petrol Pump kaba don ha Shanti Vihar Colony kaba don ha Transport Nagar, hapoh ka jaka jong ka Civil Lines police station, ki la ïathuh bad bynrap ba ïa ka jingthmu ba la pynlong ïa utei u briew ban pynïap, ym pat lah satia ban tip.
U Amit Kol, uba dei u President jong ka Rewa distrik jong ka Congress’s Scheduled Tribes Morcha, u dang leh chatting bad ki katto katne ki paralok, ha kaba u la shah thombor kynsan ha ki katto katne ngut ki briew kiba la poi ha katei ka jaka da ki ar ne lai tylli ki kali. Ki nongthombor ki la ker sawdong ïa u bad ki la shoh ïa u, ha kaba u la mynsaw jur, hadien kata u la kyllon, la ong uwei u heh pulit.
Nangta ki nongthombor ki la phet krad noh na katei ka jaka. La pynkit mar mar ïa u Kol sha hospital, hynrei ym shym la lah ban pynim ïa u, la ong u heh pulit.
U Superintendent of Police ka Rewa distrik u Gurukaran Singh u la ïathuh ba ki dang peit bniah ïa ki dur CCTV jong katei ka jaka ban lap ïa kitei ki nongthombor. La ïoh kurup ruh ar tylli ki thuk thuk na katei ka jaka. Ïa ka jingthmu jong katei ka jingpynïap briew dang tohkit, u la bynrap.
