New Delhi, Naitung:
Ka sorkar Delhi, ha ka sngi Palei, ka la bthah ba ym dei shuh ban leh ïa ki kyndon aiñ kiba sniew pyrshah ïa ki riew shimet kiba la ïashim bynta ha ka jingïaid paidbah ba la ïalam da ka Cockroach Janta Party (CJP) ha ka nongbah jong ka ri, katba la kyntait ïa kito kiba don ïa ki kam runar na ka jingïarap, katkum ka hukum ba la pynmih da ka tnad ki kam pohïing.
Ka hukum ka ong ba ha ki jaka ba la dep ban kem ne set phatok, yn sa leh kyrkieh ïa ka jingbishar bniah bad pyllait ïa kiba shah kem.
“Ka sorkar NCT jong ka Delhi kam tyrwa ban shim ïa kano kano ka sienjam kaba sniew shuh shuh pyrshah ïa ki riew shimet kiba donkti ha ki jingïakhih, bad ïa kane ka kam yn ñiew kum kaba la khang khlem kano kano ka jingtohkit hadien habud halor kane ka bynta,” la ong ka tnad ki kam pohïing.
Ka la bynrap ruh ba yn ym shim kano kano ka aiñ kaba sniew da kano kano ka bor pulit ha ka National Capital Territory pyrshah ïa kito kiba ïashim bynta ha ki jingïakhih.
Ka jingïada, pynban, “kan ym pyntreikam ïa ki briew kiba don ïa ki jingjia ba la jia ha ki kam runar, kumba la bthah ha ka hukum ba dang shen jong ka iingbishar ba ha khlieh duh,” la ong ka hukum.
Kane ka hukum ka wan hadien ba ka sorkar pdeng ka la pynbna ba yn weng noh ïa ki ejahar ba la mudui pyrshah ïa ki nongïakhih kum shi bynta jong ka jingïateh kular bad ka CJP, kaba hadien kata ka la weng noh ïa ka jingïakhih jong ka kaba 36 sngi.
Ki pulit, ki bat ïa ki nongkyrshan jong ka Cockroach Janta Party, katba ki dang pyrshang ban ïaid sha ka ïing dorbar jong ka India, da kaba dawa ïa ka jingiehnohkam jong u Myntri ka tnad pule puthi, ha New Delhi, ha ka lah sngi U Blei, ka 20 tarik, Naitung, 2026.
Kaba kham pawnam ka long ba ki pulit jong ka Delhi ki la mudui13 tylli ki ejahar ha kaba ïadei bad ka jingïakynad kaba la mih ha ka jingïaid paidbah ‘Chalo Sansad’ jong ka CJP ha ka 20 tarik u Naitung.
Ki heh ophisar ki la ïathuh ba ïa kane ka jingithuh la leh da kaba pyndonkam da ki kor ki bor kiba lah ban ithuh ïa ki dur khmat bad ki kor ring dur kiba heh bha kiba la buh ha Jantar Mantar.
Kane ka jingkulmar ka la mih ha ka jingïaid paidbah na Jantar Mantar sha ka Parliament kaba don ha New Delhi distrik.
Hashwa kane ka jingïakhih, ki pulit jong ka Delhi ki la pynkhlaiñ ïa ka jingpahara ha kylleng ka New Delhi District bad kiwei kiwei ki jaka ba sngewkhia, da kaba buh ïa ki briew kiba kham bun, ki shipai, ki jingker, ki tiar ïada ïa ka jingkulmar bad ki network jammer.
Ki pulit ki la ïathuh ba ym shym la pan jingbit na ka bynta katei ka jingïaid paidbah sha Parliament bad ki la pynskhem ba yn ym shah ïa ki nongïakhih ban rung sha katei ka jaka ba don ka jingpahara kaba jur bha.
Katkum ka jingong jong ki pulit, katto katne hajar ngut ki nongïakhih ki la pyrshang ban pynpra ïa ki jingkhang ha ki jaka bapher bapher, kaba la pynlong ïa ka jingïakynad bad ki bor pahara.
Ki pulit, ki bat ïa ki nongkyrshan jong ka Cockroach Janta Party, katba ki dang pyrshang ban ïaid sha ka ïingdorbar jong ka India, da kaba dawa ïa ka jingiehnohkam jong u Myntri ka tnad pule puthi, ha New Delhi, ha ka lah sngi U Blei, 20 tarik, Naitung.
Ki pulit ki la ïathuh ba ki la pyndonkam da ki lyer pynsat khmat bad ki lathi ban pynpra ïa ki paidbah hadien ba ki jingkyrpad ba la ju pynlong ki la pulom, katba ki la kynnoh ba ki nongïakhih ki la kawang maw bad pynjulor ïa ki mar ki mata jong ki paidbah.
Ki pulit ki la ïathuh ba kumba 200 ngut ki briew bad palat 65 ngut ki nongïakhih ki la mynsaw ha katei ka jingïakhih, katba palat 15 tylli ki kali ki la shah pynjulor.
Katei ka kynhun ka la mudui ruh ïa ka ejahar ha Special Cell police station pyrshah ïa ki katto katne ki Social Media Handle halor ka jingkynnoh ba ki la buh ïa ki kyntien pynjah burom ïa u Myntri Rangbahduh.
Hadien katei ka jingïakynad, la kem ïa ki katto katne ngut ki nongïakhih, wat la ki heh pulit hadien ki la ïathuh ba baroh kiba la shah kem la pyllait noh.
