Thiruvananthapuram, Nailar:
Ka jylla Kerala ka la khamlait na ka jingshah ktah jur na ka jingjur slap ha kiba bun ki bynta jong ka ha ka sngi U Blei, hynrei ka jinghap slap ka dang don ha ki katto katne tylli ki jaka ha ka por mynmiet kumba la sakhi, ha kaba la bthah ïa ki nongshong shnong bad ki bor ba dei khmih ba ki dei ban long kiba husiar.
Ha kine ki ar sngi ba la dep, ka jingïap briew ha ki jingjia ba ïadei bad u slap, ka la nang kiew, hapdeng ka jingjulor kaba jur bad ka jingshlei um. Haduh mynta ki don haduh 11 ngut ki briew kiba la duh ei ïa la ka jong ka jingim, katba 6 ngut pat la ïathuh ba ki la jah rngai.
Lait noh ka Kollam bad ka Thiruvananthapuram, baroh ki distrik ki dang sah hapoh ka jingpynbna ba ki dei ban long kiba husiar khamtam ha ka por mynmiet. Ki bor pynïaid ki la pynmih ïa ka jingmaham kaba lah ban jia ka jingshlei um na ka bynta ka district Pathanamthitta namar ba la khmih lynti ba ka Pampa kan sakhi ïa ka jingshlei um kaba jur hadien ka jingjur jong u slap. La pynmih ïa ki jingpynbna jingmaham ïa ki briew kiba sah harud ka wah Pampa bad ka wahduid Kakkad.
U Myntri Rangbah ka jylla u V D Satheesan u la kyntu ïa ki briew kiba sah ha ki jaka lum ba kin long kiba husiar bha, katba u Myntri ka Revenue u A P Anilkumar u la ong ba ka sorkar ka la pynkhreh lut nadong shadong ban ïaleh ïa kano kano ka jingjia ba kyrkieh. La pynthikna ïa ka bam, ka um dih, ka jingsumar bad ki jaka sumar ha baroh ki jaka sah ba shipor, la kdew u Myntri.
