Lucknow, Nailar:
U President jong ka seng Samajwadi Party u Akhilesh Yadav ha ka sngi U Blei u la ong ba ka jingsynshar ba mynta ha Uttar Pradesh ka la khang palat 26 hajar tylli ki skul sorkar naduh ba ka la shimti ïa ka bor synshar ha u snem 2017, da kaba kynnoh ba ïa kane la leh ban khanglad ïa ka jingpule ïa ki khynnah na ki jaitbynriew PDA (Backwards, Dalit, Minority).
Haba kren ha ka jingïalang bad ki nongthoh khubor ha ophis treikam jong ka seng hangne, u Yadav u la ong ba ka Samajwadi Party kan sa rah ïa kane ka mat ha ka por ba long Monsoon Session jong ka Assembly, kaba la sdang hynnin ka sngi.
Une u Myntri Rangbah barim ka jylla u la kynnoh ba katkum ki jingkheiñ ba tikna, ka Uttar Pradesh ka don haduh 1,13,938 tylli ki skul rit jong ka sorkar haduh u bnai Lber jong u snem 2017, ha kaba ka BJP ka la wan ha ka bor synshar.
Ki la don palat 26 hajar tylli na ki la khang naduh katei ka por, u la ong.
Ka jingkhang kaba bun eh ka dei ha Lakhimpur Kheri, ha kaba ki skul ki la shah khang haduh 758 tylli bad bud sa ka Sitapur (650) bad ka Prayagraj (638).
Ha Gorakhpur, ka jaka trai jong u Myntri Rangbah ka Jylla, u Yogi Adityanath, kumba 500 tylli ki skul rit ki la shah khang, u la ong.
Haba kdew ba ka jingbun paid jong ki khynnah skul ha ki skul rit jong ka sorkar ki dei na kiwei pat ki jaitbynriew ba sahdien bad ki jaitbynriew ba la buh kyrpang, u Yadav u la kynnoh ba ka BJP kam kwah ba ki khynnah na ki jaitbynriew PDA kin ïoh ïa ka jingnang jingstad.
U heh SP u la ong ba ka jingpynrung kyrteng ha ki skul primary sorkar ka la hiar na ka 1.17 klur ngut ki khynnah skul ha u snem 2017 sha kumba 89 lak eiei ha u snem 2026.
Na kine ki 89 lak ngut, kumba 25 lak ngut ki samla pule ki dei kiba hap ha ka kyrdan OBC, Scheduled Caste bad Scheduled Tribe. Ka jingdon ki nonghikai ha kine ki skul ruh ka la hiar na kumba 4 lak ha u snem 2017 sha ka 3.40 lak mynta, katba haduh 81,000 tylli ki kam hikai ki dang sah thylli, u la ong.
U Yadav u la kynnoh ba ka bor synshar ka pynduna ïa ki kam hikai namar ba kam kwah ban ai kam sorkar kaba neh, namar ba ka jingpynrung kam man ka por kan donkam ïa ka jingmang pisa bad ka jingpyntreikam ïa ki polisi ba la buh kyrpang.
U Yadav u la ong ba baroh ki nongthaw ain jong ka Samajwadi Party kin ïatreilang halor ki mat kum ka pule puthi, ka jinglait ki jingkylli, ka aiñ bad ka suk ka saiñ, bad ka jingkynnoh bamsap.
U la ong ba ka jingkhang ïa ki skul primary sorkar ka la ktah jur ïa ka jingpule jong ki khynnah kynthei, ha kaba ka jingdon ki khynnah kynthei kiba pule ha kine ki skul ka la hiar na ka 61.57 lak ha u Lber 2017 sha kumba 45 lak eiei mynta.
Da ki hajar tylli ki skul sorkar ki dang duna ïa ki jingdonkam ba kongsan, u la ong da kaba pynpaw ba kumba 7,000 tylli ki skul kim don bording, kumba 2,300 tylli kim don paiñkhana na ka bynta ki khynnah kynthei, 576 tylli kim don um dih bad haduh 23,000 tylli kim don jingpynbiang ïa ka jinghikai kompiwtor.
