New Delhi, Nailar:
Ka ïingbishar jong ka nongbah Delhi ka la hukum ïa uwei u briew ban ïeng ha ka jingbishar halor ka jingkynnoh ba u don palat 4,300 kg ka dawai jyrhoh kaba don ïa ka Codeine, ka jingbun kaba ka liang pynngat ka la ong ba ka la palat ïa ka jingthew kaba shi kg kaba la buh katkum ka kyndon hapoh jong ka Narcotic Drugs and Psychotropic Substances (NDPS) Act.
U Nongbishar ba kyrpang u Jitendra Pratap Singh u la hukum ban thaw ïa ki jingkynnoh pyrshah ïa uba shah kynnoh u Vipin Chawla katkum ka aiñ NDPS, da kaba peit ba la shna ïa ka mukotduma ba nyngkong bad ki jingthoh ba la buh ha ka rekod ki la pynmih ïa ka “jingsuba kaba jur” pyrshah ïa u.
Ha ka hukum ba la pynmih ha ka 30 tarik, Naitung, u nongbishar u la kyntait ïa ka jingkynthoh jong u Chawla ba u dei tang u nongpynïaid ha ka Surya Pharma bad ba ïa ka stok la pynphai biang sha u nongsam hadien ka jingkhang jong ka sorkar ïa ki katto katne ki jingdih ba khleh Codeine. U la kam ruh ba ka kompeni ka don ïa ki license kiba biang.
“Ka jingïoh biang ka long kaba palat lypa ïa ka jingbun ba la buh da ka aiñ NDPS. Kane ka jinglong jingman, hi dalade, ka long ka jingpynngat kaba khlaiñ ha ka kyrdan jong ka jingshah kynnoh,” ong u nongbishar.
Ka kashari ka la kdew ba ki kaiphod Forensic ki pynïadei ïa u Chawla bad ka jingthied ïa ki mar ba la khang lyngba ki jingsoi jong u ha ki Invoice ba la kylli jingkylli. Ka la ïohi ruh ba ki jaka ba la buh ïa ki dawai kim don license.
Katkum ka jingpynngat, ka Delhi Police’s Special Cell ka la leit ban khynra ïa kawei ka dukan ha Azadpur ha u snem 2023, ha kaba ki la lap haduh 302 tylli ki synduk kiba don 36,238 tylli ki bilor dawai jyrhoh kaba 100 ml ka Codeine.
Ka la kynnoh ba katba la ai 48,818 tylli ki bilor sha uba shah kynnoh, hynrei ki rekod na ka bynta ki 12,580 tylli ki bilor kiba dang sah kim shym la don.
