Vijayawada, Nailar:
U Myntri Rangbah ka jylla N Chandrababu Naidu ha ka lah sngi U Blei u la bthah ïa ki heh sorkar ban shim ïa ki lad ki lynti ban ïada na ka jingeh ha ka um bam umdih ha ka jylla hapdeng ka jingrang tyrkhong kaba jur kaba la mih na ka jingjia jong ka El Niño.
U la kyrpad ïa ki ban buddien beit ïa ka jinglong jingman jong ka jingkyrduh um bad ban bishar bniah ïa ka jingdon um ha ki jaka buh um bad kiwei kiwei ki tyllong um ban pynthikna ïa ka jingpynbiang um dih kaba khlem jingthut.
Haba pynïaid ïa ka jingïalang bishar bniah halor ka jingtreikam jong ki tnad bapher bapher ha ka RTGS Centre ha Secretariat, u Naidu u la bthah ïa ki heh sorkar ba kin pyndonkam hok ïa ki um bashlei kiba rung sha ka Krishna basin na ki thaiñ sharum lyngba ka jingpynïaid ïa ka um kaba biang.
U la maham ruh ba ka jinglong jingman jong ka jingkyrduh kaba slem ka lah ban wanrah ïa ka jingduna bam masi bad bthah ïa ki tnad ba dei peit ba kin shim ïa ki lad ki lynti shwa ban weng ïa kane ka jingeh.
U Myntri Rangbah ka jylla u la ban jur ïa ka jingdonkam ban leh ïa ka test ïa ka um dih man ka por ha ki jaka sor bad nongkyndong bad u la bthah ïa ki heh sorkar ban pynpaw paidbah ïa ki kaiphod test jong ki laboratory.
U la bthah ruh ba kin pynlong ïa ki jingjurip ha ki jaka bad ban buddien man ka por ïa ki Anganwadi centre.
Ki heh sorkar ki la pyntip sha u Myntri Rangbah ba ka jinghap slap ha ki jaka pyllang um ba sharum ka lah ban pynbha ïa ka jingdon um ha ka wah Krishna.
Ki la ong ba ka jingtuid um sha ka wah Krishna ka la nang kiew ha kine ki sngi ba la dep bad ki la ïathuh ruh ïa u shaphang ka jinglong jingman jong ka jingshlei um ha ka wah Godavari.
