Hyderabad, Nailar:
U kba uba shongdor T.87.89 klur uba la thmu ban pynkylla sha u khaw bad ban pynpoi sha ka sorkar hapoh ka jingtreikam jong ka Custom Milled Rice (CMR) la lap ba u la jah na ki lai tylli ki karkhana tylliat khaw ha ka shnong Thakkallapalli jong ka Jagtial Rural mandal, kaba la pynlong ban mudui mukotduma pyrshah ïa ki trai jong ki.
Ka tnad Vigilance and Enforcement ka la lap ïa ki jingkynnoh bym ïaid beit ha ka por ba ki jurip kyndit ha ki karkhana Sri Abhaya Anjaneya Swamy Industries, Sri Lakshmi Ganapathi Industries bad Sri Lakshmi Balaji Industries.
Ki heh ophisar ki la lap ba 34,388 metric ton u kba, uba shong dor T.87.89 klur, ym shym la lah ban kheiñ ha ki por ba jurip.
Hadien kane ka jingkhynra, ka tnad Vigilance and Enforcement ka la aiti ïa ka jinglap jong ka sha ki bor pynïaid jong ka District Civil Supplies, kiba la ujor sha ki pulit. Da kaba leh katkum ka jingbthah jong u District Collector, ki pulit ki la Register mukotduma pyrshah ïa ki trai jong ki lai tylli ki karkhana tylliat khaw.
Ki heh sorkar ki la ong ba ka jingtohkit kan long halor ka jingwad ïa u khaw uba la jah, ban ithuh ïa kiba donkti bad ban tip la ka stok ka dei kaba la pynkylla beaiñ ne pyndonkam bakla.
Ha Medak distrik, ki heh jong ka Vigilance ki la pynlong ïa ka jingkhynra ïa ki lai tylli ki karkhana shna khaw ha Medak bad la Register ar tylli ki mukotduma hadien ka jingkynnoh ba ki karkhana ki la die ïa u khaw uba la thmu ban pynpoi sha ka sorkar sha ki jylla ba marjan.
Ki heh ophisar ki la jurip ïa ki karkhana shna khaw ha kylleng ka Kowdipally ha Kulcharam mandal, Papannapet bad Alladurg mandal bad ki la lap ïa ki jingbym ïahap ha ka stok jong ki byrni khaw ban pynpoi sha ka sorkar.
Ha Sri Satyasai Rice Mill ha Kowdipally, ki ophisar ki la lap ïa ka jingduna haduh 3,029.96 metric ton (kumba 75,749 byrni) ki stock khaw jong ka sorkar. Hadien ba la pynshisha ba ïa u khaw la die ha ka ïew kaba plie ha ka jaka ban pynpoi ïa u kba uba dei ban leh kum u Custom Milled Rice (CMR) sha ka sorkar, la mudui mukotduma pyrshah ïa une u trai ka karkhana tylliat kba hapoh ka Essential Commodities Act (EC Act, 1955).
Ha kawei pat ka karkhana tylliat khaw kaba don ha ka headquarter jong ka Papannapet mandal, kaba dei jong u juh u trai, ki heh sorkar ki la lap ruh ïa ka jingbym ïahap ha ki jingbuh khaw bad ki la mudui sa kawei pat ka mukotduma.
Kumjuh ruh ka jingjurip kaba la pynlong ha Sai Chinni Venkateshwara Rice Mill kaba don harud jong ka Gadipedda Puram ha Alladurg mandal, bad kumjuh ruh ha ki katto katne ki karkhana kiba don hapoh jong ka Sangareddy distrik, ki la pynpaw ïa ka jingbym ïahap jong ki stok. Hynrei ki heh sorkar kim shym la pynpaw ïa kaei ka jingshah kynnoh ne mukotduma ba kyrpang pyrshah ïa kine ki karkhana.
Ha kajuh ka por, hapdeng ki khubor hamsaïa ba la pynlong ïa ka jingkhynra ïa kawei ka karkhana tylliat khaw ha Gadipeddapur jong ka Alladurg mandal, la ïathuh ba ki dkhot jong ka Rice Millers Association ki la pynbor ïa ka sorkar ba kan sangeh noh ïa ki jingkhynra.
Ha kajuh ka por, kawei ka karkhana shna khaw ha Bodhan ka la shah mudui namar ba la kynnoh ba kam shym la lah ban pynbiang ïa ka CMR kaba shongdor T.20 klur hadien ba ka la weng noh ïa u khaw uba 64,000 kwintal na ka sorkar ha ki ar tylli ki aïom thied. Lada kynthup ïa ki jingpynshitom, ka jingkitkhlieh ka long T.23 klur.
U Manager jong ka District Civil Supplies Corporation u B Praveen u la ïathuh ba la ujor pyrshah ïa ka Sri Sai Laxmi Agro Industries hadien ba ka jingjurip jong ka tnad Vigilance and Enforcement ka la lap ïa ki jingbym ïahap kiba ïadei bad ka aïom Rabi 2022-23 bad Kharif 2025-26.
Ka jingjurip ka la lap ba ka karkhana ka la kit 64 hajar kwintal u khaw hynrei kam shym la lah ban pynpoi ïa ki stok CMR kiba ïadei.
Da kaba pynshong nongrim ha ka kaiphod pahara, ki pulit jong ka Bodhan Rural ki la ujor mukotduma katkum ki kyndon ba ïadei jong ka Bharatiya Nyaya Sanhita (BNS).
Kane ka dei ka sien kaba ar kaba kum kane ka jingjia hapoh ka distrik. Kham mynshwa, ka Civil Supplies Corporation ka la ujor pyrshah ïa ka Siddirameshwara Agro Industries halor ka jingkynnoh ba kam shym la lah ban pynpoi 2.03 lak kwintal u khaw CMR ba shongdor T.68 klur, kynthup ïa ka kuna bad ka sut.
Ïa kane ka mukotduma la mudui ha thanat Nizamabad Rural. Ki tyllong khubor, ki ïathuh ba u trai jong katei ka karkhana, u Kaparthi Sravan, u la leit sha ka ïingbishar, bad ki pulit ki dang ap ïa ki jingbthah kiba kham bniah.
U Praveen u la ong ba ki heh jong ka tnad marbam marbam paidbah, ryngkat bad ki Deputy Tahsildar, ki dang bteng ïa ka jingjurip ban pynbeit ïa ka jingthied ïa ka CMR na ki karkhana tylliat khaw. Ha kajuh ka por, u Manager jong ka Kamareddy Civil Supplies Corporation u K Srikanth u la ong ba ka tnad Vigilance ka la pyntip ruh ïa ki jingbym ïaid beit ha Guru Raghavendra Rice Mill, ha kaba 31,000 kwintal u khaw uba shongdor T.7.5 klur na ka aïom Kharif 2025-26 la kynnoh ba u la jah.
Ki heh sorkar ki la ïathuh ba ka tnad Vigilance and Enforcement ka dang bteng ïa ka jingjurip ha baroh kawei ka jylla. Hadien ka jingtohkit kaba dang ïaid shakhmat, katto katne ki karkhana shna khaw ha ka distrik Nizamabad ki la sdang ban pynphai biang ïa ki pisa ba la die lilam na ka bynta ka jingpyndonkam bakla ïa ki stok jong u kba.
