Bhubaneswar, Nailar:
Ka sorkar Odisha ka la pynrung ïa 91 tylli ki lad pynïoh jingsumar kaba kyrpang ïa ka jingpang bampong na kane ka jylla hapoh ka jingtreikam ka Ayushman Bharat – Pradhan Mantri Jan Arogya Yojana (AB-PMJAY).
Ïa kine ki song jingïarap la pynrung ha ka AB-PMJAY lyngba ka Mukhyamantri Cancer Care Abhiyan hadien ba la ïoh ïa ka jingmynjur na ka tnad ka koit ka khiah jong ka NHA. Ïa ki song jingïarap ba la pynrung thymmai la pyntip ruh sha baroh ki hospital ba la pynrung kyrteng ban pyntreikam.
U Mukesh Mahaling, Myntri ka tnad Health and Family Welfare, u la ong ba kane ka sienjam ka long ban pynthikna ba ki nongïoh jingmyntoi kiba dei hok ha Odisha kin ïoh ïa ka jingsumar ïa ka jingpang bampong ha ka por kaba biang, kaba bha bad kaba khlem donkam pisa.
Ka jingkynthuplang jong ka Ayushman Bharat PM-JAY bad Gopabandhu Jan Arogya Yojana (GJAY) ka dei kaba la sdang ha ka jylla ha u bnai Ïaïong jong u snem 2025 ha ryngkat ki 2,163 tylli ki song ai jingsumar.
Hynrei hadien ba la pynrung ïa ki 91 tylli ki lad jingsumar bathymmai kiba kyrpang na ka bynta ki jylla, ka jingdon jong ki jingsumar ïa ka jingpang bampong ka la kiew sha ka 545 tylli, katba ka jingdon jong ki jingsumar baroh hapoh kane ka skhim ka la kiew sha ka 2,254 tylli. Ka jingpynrung kaba thymmai ka la nang pynïar shuh shuh ïa ka jinglah ban ïoh ïa ka jingsumar ba kyrpang ïa ka jingpang bampong na ka bynta ki nongïoh jingmyntoi ha kylleng ka jylla.
Ka sorkar ka la sdang ïa ka Mukhyamantri Cancer Care Abhiyan katkum ka jingai jingmut jong ki riew shemphang, ha kaba la mang pisa haduh T. 311 klur, da kaba ithuh ïa ka jingpang bampong kum ka jingpang kaba shyrkhei bha kaba donkam ban lap kloi ïa ka bad ban ïoh ïa ki jingsumar kiba bun jait. Ki heh jong ka tnad ka koit ka khiah ki la ong ba kane ka thup jong ki song ban ai jingsumar ka la dep ai jingmyntoi ïa ki nongpang.
