Visakhapatnam:
Ki la don palat 55 ngut ki khynnah ha ka shnong Gondivalasa kaba hap hapoh ka Gasaba panchayat ha Dumbriguda mandal jong ka Alluri Sitarama Raju distrik ki pynlut ïa ka por skul jong ki ha ki baranda jong ki ïing bad ha trai ki dieng, namar ba katei ka shnong kam don ïing skul watla ka don ïa u nonghikai na ka bynta ki klas I haduh VI.
Ka jingbym don ka kamra klas kaba neh ka la pynlong ïa ki khynnah ban pule ha ki jaka ba lait, ha kaba ki jinghikai ki ju shah pynthut namar u slap bad ka jingbym don wat ki tiar hikai ba kongsan kum ki miej, ki shuki bad ka Blackboard.
“Ki klas ki sangeh man ka por ba slap. Ngim lah ban pule bha namar ym don Blackboard, bad lada pynbiang ruh ym don jaka ban buh”, la ong ki samla pule. Ki khynnah ki la pynpaw ruh ba ki jinghikai ba la pynlong ha ki phyllaw ïing ne baranda bunsien ki shah pynthut na ki kam ïing bad ki jingïakren jong ki briew kiba don hapoh ïing, kaba pynlong ïa ka ban eh ban pynleit jingmut ïa ki jingbatai.
U nonghikai u C Krishna Rao u la pynkynmaw ba kawei ka ïing skul ka la shah mynjur hapoh ka prokram Nadu-Nedu ha ka por jong ka sorkar YSRCP ba mynshuwa hadien ka jingpyrshang jong u nongsynshar ba mynshuwa jong u. Hynrei ka projek kam shym la ïaid shaphrang namar ba ym shym la pyllait pisa.
“Nga la rah ïa kane ka mat sha ki bor ba dei peit la bun sien, u Assistant Tribal Welfare Officer ruh u la hiar sha katei ka shnong ban jurip ïa katei ka jaka. Hynrei ka jingtrei ïa ka skul kam pat long kam. Lada slap ka kylla long ka bym lah shuh ban pynlong klass”, u la batai.
Na ka bynta kiba bun ki kmie ki kpa, ka jingbym don ki lad ki lynti ka la kylla long ka jingeh ha ka pule puthi bad ha ka liang ka pisa tyngka. Don kiba la pynrung skul ïa ki khun ha ki skul shimet ha ki shnong ba marjan watla ki ïaleh ban pyndap ïa ka jinglut jingsep.
“Ki khynnah jong ngi ki pule ha madan. Ngi kwah ba ki bor pynïaid kin pynbiang ïa ka ïing skul kaba biang bad ki jingdonkam ba kongsan. Nga la hap ban pynrung skul ïa ki khun jong nga ha ka skul shimet namar ba ym don skul hangne, hynrei ban siew ïa ka bai skul ka la nang eh”, la ong u nongshong shnong u V Venkat.
Ki kmie ki kpa ki la kyntu ruh ïa ka tnad pule puthi bad ka tnad riewlum ba kin buddien beit ïa ka jingtreikam jong ka skul bad ban pynthikna ba ki klas kin ym dei ban shah pynthut.
Na ka bynta ki khynnah jong ka Gondivalasa, ka jingleit skul ka la kylla long ka jingïakhun ban pynïadei bad ka jinglong ka suiñbneng bad ka jaka ba ki shah hikai ban ïa kaba pule ha ka kamra klas. Ki nongshong shnong ki la kyrpad ïa ki bor ba dei peit ban pyndep noh ïa katei ka ïing skul kaba la sahteng la slem bha bad ban pynbiang ïa ki jingdonkam ba kongsan na ka bynta ki khynnah.
