Srinagar, Nailar:
Ki kynhun jong ki Kashmiri Pandit ha ka lah sngi U Blei ki la pynpaw ïa ka jingsngew khia halor ka jingkynnoh ba ka shithi byrngem ba la pynmih da ka kynhun lehnoh United Liberation Council (ULC), kaba la ong ba ka dei ka kynhun ba shakhmat jong ka kynhun lehnoh Lashkar-e-Taiba (LeT) kaba don ha Pakistan.
Ka sorkar ka la pynjur ïa ka jingpahara ha ka thaiñ jong ka jaka them, ha kaba ki Pandit ki sah, bad ka la bthah ïa ki nongtrei Pandit ba kin trei na ïing katto katne por.
Kane ka shithi byrngem kaba la kynnoh, ka dei kaba la pynmih da ka kynhun lehnoh, hadien ka jingthombor kaba la jia ha ka taïew ba la dep, ha ka thaiñ ba shaphang Shathie jong ka Kashmir, ha kaba uwei u pulit bad arngut ki nongbylla sngi na Chhattisgarh, ki la shah pynïap.
Ka shithi ka la kdew kyrpang ïa hynriew ngut ki nongtrei Pandit kiba trei ha kawei ka tnad sorkar.
Ka kynhun ka la sam ïa ki kyrteng jong ki 6 ngut ki nongtrei, ryngkat bad ki nombar phone jong ki, bad ka la kam ba ki don ïa ki jingtip ba pura, kynthup ïa ki kyrteng jong ki bahaïing hasem bad ki jaka ba ki don.
Ki tyllong khubor ki ïathuh ba hadien katei ka jingbyrngem, ki bor pahara ki la pynjur ïa ka jingpahara ha ki jaka ba ki Pandit ki sah.
“Ki bor pahara ki la pynjur ïa ka jingpahara bad jingpahara ha ki jaka ba shong ki Pandit”, ki la ong.
U Ranjan Jotshi, uba dei u Vice president jong ka seng jong ki nongtrei ba la shah pynkynriah jaka ha ka jylla Kashmir, u la pynpaw ïa ka jingsngewkhia halor ka jingma ïa ki nongtrei Pandit bad u la khot ïa ka jingïada kaba kham khlaiñ.
U la ong ba ka sorkar ka dei ban pynbiang ïa ka jingpahara kaba biang ïa kito kiba la paw kyrteng ha ka thup bad ban pynthikna ïa ka jingshngaiñ bad jingïoh jingïada jong uwei pa uwei u nongtrei Pandit ba la buh ha ka jaka them bad kumjuh ruh ïa ki bahaïing ha sem jong ki.
Halor ka jingeh ha ka liang ka jingshngaiñ, ka bor synshar ka la bthah ïa ki nongtrei Pandit kiba la buh ha ka jaka them ban trei na ïing katto katne por.
“La bthah ïa ngi ba ngin trei na ïing haduh ka 25 tarik, Nailar”, la ong uwei u nongtrei ka PM Package Kashmiri Pandit. Ka kynhun Pandit kaba donbor bha-ka KPSS ka la ong ba ki jingshah thombor ba dang shen ha ka thaiñ ba shaphang Shathie jong ka Kashmir, bad bud sa ki jingthoh byrngem bathymmai kiba la pynpaw kyrteng ïa ki nongtrei Pandit Kashmir, ki la pynpaw biang sa shisien ïa ka jingsngew ba shyrkhei jong ki KP ha Kashmir.
Ka KPSS ka la buh jingkylli kumno ki jingtip ba kyrpang jong ki 6 ngut ki nongtrei kynthup ïa ki nombar phone jong ki, ki la paw paidbah.
“Hato ka dei ka jingpynkheiñ ïa ka jingïada, ka jingpynkheiñ ïa ka jinglong rieh ne ka jingpynmih khubor kaba thmu?” ka kynhun ka la kylli.
“Pynbeit ïa ki jingduna. Ïada ïa kiba rit paid-shwa ba ka histori kan jia biang ïalade,” la thoh ka KPSS ha ka rynsan X.
Uwei pat u nongpynïaid ïa ka kynhun KP Panun Kashmir u Dr Agnishekhar u la ong ba ka jingpynmih ïa ki kyrteng bad ki jingtip ba ïadei bad ki briew ryngkat bad ki jingbyrngem ba shai ïa ki briew shimet bad ki bahaïing jong ki ka long ka mat kaba sngewkhia bha.
U Convenor jong ka kynhun KP Panun Kashmir u Agnishekhar u la kyntu ïa u L-G Manoj Sinha ban bthah ïa ki pulit bad ki tnad pahara ban leh ïa ka jingkhmih bniah ïa baroh ki briew kiba la kdew kyrteng ha ka shithi byrngem bad ki bahaïing hasem jong ki bad ban bishar bniah ïa ka jingshngaiñ jong ki nongtrei Pandit kiba trei ha ki tnad sorkar kiba sngewkhia.
