New Delhi, Nailar:
Tang hadien katto katne minit ba la sdang ka sngi ba ar jong ka Dorbar Lyiur ha ka lah sngi U Blei, Nyngkong, 6 ngut ki MLA ka AAP ki la shah pynkynriah noh na ka ïingdorbar jong ka Delhi hadien ba u Lamphang u Vijender Gupta u la bthah ïa ki ban weng noh ïa ki T-shirt “ba la pynpaw ïa ka jingpyrshah”.
Kine ki MLA ki long u Sanjeev Jha, u Jarnail Singh, u Kuldeep Kumar, u Prem Kumar, u Som Dutt bad u Ajay Dutt. Ka jinghuri hura ka la sdang naduh ba u Deputy Speaker u Mohan Singh Bisht u la pyrshah ïa ki T-shirt ba la phong da ki MLA ka AAP hapoh ka ïingdorbar.
“Ka Liang Pyrshah ka la pynthut ïa ka jingïakren kaba dang ïaid ha ka Ïingdorbar halor ka mat kaba ïadei bad ka jingmyntoi jong ki paidbah; kumta, la pynïasoh noh ïa ki,” ong u Gupta.
Ki MLA ka AAP ki la pynmih ïa ki jingpyrta halor ka jingkynnoh ba ki la leh thok halor ki bicycle hapoh ka sorkar BJP, hadien kata la beh noh ïa ki na ka ïingdorbar thawaiñ.
“Ki kyndon ki kren shai ba yn ym shah ïa ka ktien bym ïahap bad ka Parliament hapoh ka ïingdorbar, kane kam long kaba lah ban pdiang”, la ong u Gupta.
U Lamphang u la ong ruh ba u nongïalam ka liang pyrshah u Atishi u dei ban don hapoh ka ïingdorbar bad u la ong ïa ka liang pyrshah ban rai mano ban ïalam ïa ki hapoh ka ïingdorbar.
Ha kajuh ka por, ka AAP ka la kynnoh ba u Lamphang u la hukum ïa ki MLA jong ka ban mih noh na ka ïingdorbar hadien ba ki la dawa ban ïakren halor ka jingkynnoh thok ïa ki bicycle. U Legislative Party Chief jong ka seng AAP u Sanjeev Jha, u la buh jingkylli balei ba u Lamphang u ïada ïa ka BJP, da kaba kynnoh ba ka la pynlong ïa ka “jingleh thok kawei hadien kawei pat”.
“Ka sorkar BJP ka dei ka sorkar jong ki nongleh thok bad ngi la pynpaw sa kawei pat ka jingleh thok kaba khraw. Ïa ka bicycle kaba ngi thied ha ka dor T.4 hajar mynta la ai sha ki khynnah da ka sorkar BJP ha ka dor T.7 hajar. La shim ïa ka Commission kaba T.3 hajar na ka bynta 1.3 lak tylli ki bicycle”, la ong u Jha.
