Bhubaneswar, Nailar:
U MP ka Bargarh, u Pradeep Purohit, u la pan ïa ka lad pynroi kaba kyrpang na ka bynta ka Padampur sub-division, kaba ïasyriem bad ka prokram pynroi ba kyrpang jong ka KBK, da kaba kdew ïa ka jingeh ïa ka jingïoh um kaba ju jia man ka por ha kane ka thaiñ bad ka jingduna ki lad kamai.
Haba ïasam ïa ki jingtip ba bniah halor kane ka jingdawa ha ka lah sngi U Blei, u Purohit u la ong ba u la aiti ïa ka shithi sha ka Myntri pla tyngka jong ka sorkar pdeng ka Nirmala Sitharaman ha ka jingleit jngoh jong u dang shen sha New Delhi, da kaba pan jingïarap na ka bynta ka jingtuklar jong ka halor kane ka kam.
Ha ka shithi u Purohit u la kyrpad ïa ka Myntri ban pynjlan ïa ka Special Package sha Padampur sub-division kaba kynthup ïa ki 6 tylli ki block kata ka Paikmal, Padampur, Jharabandh, Sohela, Bijepur bad Gaisilet. U MP u la kyntu ïa ka Sitharaman ban ai ïa ka jingmynjur katkum ka nongrim ïa kane ka package bad ban ai ïa ka jingmang pisa kaba biang ha ka mang tyngka jong ka sorkar pdeng ka ban sa wan lane lyngba ka jingdawa jingïarap ba la pyndap.
U la pan jingbit ruh na ka sorkar Odisha, lyngba ka bor synshar jong ka Bargarh, ban pynkhreh bad aiti ïa ka Detailed Project Report (DPR) kaba bniah ryngkat bad ki jingtyrwa pynroi katkum ki bynta bad ki jingkheiñ pisa ban bishar bniah da ka sorkar pdeng.
U Purohit u la pynpaw ïa ka jingkyrduh um kaba ju jia man ka por ha ka thaiñ, ka jingbym biang ki jaka ai um bad ki jaka dih, ka jinghiar ka um hapoh khyndew bad ka jingduna ki lad kamai.
U la pynpaw shuh shuh ba ka ïoh ka kot jong ka Padampur kaba shaniah ha ka rep ka riang ka mad jingeh na ka jingbym lah ban thung jingthung, ka jingkit ram bad ka jingwan buhai shnong katkum ka aïom, katba ka jingroi jong ki karkhana ka dang duna bha namar ka jingbym don ki karkhana pynmih mar rep, ki kynhun MSME bad ki jaka pynmih marbam.
Da kaba kdew sha ka jaka jong ka Padampur harud khappud jong ka Chhattisgarh, u MP u la wad ïa ka jingbei tyngka pdeng kaba pynleit jingmut ha ki jingtei bad jingpynïasoh. “Ka package ba la tyrwa ka lah ban kynthup ïa ka jingpynlang um, ka um dih, ka jingpynroi ïa ki wah, ka jingpyndap um hapoh khyndew, ka jinglum um slap, ka jingpynïasoh sha ki nongkyndong, ka agro-processing, ki MSME, ka jingpynroi ïa ki sap, ka koit ka khiah, ka pule puthi, ki jingtei digital bad ka rep ka riang kaba lah ban ïakhun pyrshah ïa ka jingkylla ka suiñbneng,” u la ong.
U Purohit u la kyrmen shuh shuh ba kane ka package ba la aiti kan weng ïa ki jingduna ha ka roi ka par kiba la slem bha jong ka sub-division katba ka dang pynbha ïa ka jingai um, ka jingmih ha ka rep ka riang, ka kam bad ka jingroi jong ki karkhana, bad kan ïarap ban pynduna ïa ki jingbym ïahap ha ki thaiñ katkum ka jingthmu jong ka Viksit Bharat ha u snem 2047.
