Vijayawada, Nailar:
Ha ka jingpynbor kaba khraw ban rah ïa ka roi ka par sha man ki thliew ïing jong ki briew kiba sah ha ki jaka ba jngai bad ba la shah iehnoh beiñ, ki la don kumba 158 tylli ki shnong bad ki shnong rit ha Andhra Pradesh ki la buh ban ïoh ïa ka jingpynïasoh surok ha ka sien kaba nyngkong.
Kane ka projek kaba T.422 klur, kaba la shim hapoh ka Pradhan Mantri Gram Sadak Yojana (PMGSY) la khmih lynti ba kan pynkylla ïa ka jingim jong ki hajar ngut ki briew kiba sah ha ki jaka ba kyndong khlem lad ban ïoh ïa ka pule ka puthi, ka koit ka khiah, ki ïew ki hat bad kiwei kiwei ki jingdonkam ba kongsan. Hapoh kane ka projek yn shna 146 tylli ki surok kiba heh 347 km bad 19 tylli ki jingkieng ha kylleng ki distrik jong ka Jylla.
Kane ka projek ka dei shi bynta jong u Symbud Myntri Rangbah (Panchayat Raj and Rural Development) u Pawan Kalyan ban pynthikna ba ki jingmyntoi jong ka roi ka par kin poi wat sha ki jaka shong jaka sah bakhatduh ha ka jylla.
Ka jingmang na ka bynta ka projek shna surok ka la don bad la dep bna ai, kane ka plie lad na ka bynta ki jingtrei ban leh da ka Panchayat Raj Engineering Department. Sa kawei pat ka jingmang kaba long T. 24.47 klur la dep ban mang na ka bynta ki jingpynbiang ïa ki surok na ka bynta ki san snem.
Ki jaka shong jaka sah ba la ithuh na ka bynta katei ka projek surok ki long kiba la saphriang ha kylleng ki jaka jong ka Alluri Sitarama Raju, Parvathipuram Manyam, Anantapur, Sri Sathya Sai, Kurnool, Kadapa, Tirupati, Nellore, Prakasam, Palnadu, NTR, Eluru, Polavaram, Vizianagaram bad Srikakulam distrik.
Kane ka jingthmu ka long hadien ka ‘Adavi Thalli Bata’, lyngba jong ka la dep ban pynbiang ïa ka jingpynïasoh surok sha ki katto katne ki shnong kiba don ha jrong lum ha ki distrik jong ka ASR bad Parvathipuram.
U Symbud Myntri Rangbah u la bthah ïa ki heh sorkar ban pynneh ïa ka jinglong kaba bha tam ha kaba shna ïa ki surok bad ki jingkieng, da kaba ban jur ba ki jingtei ba la thaw da ka pisa paidbah ki dei ban neh bad shakri ïa ki paidbah da ki phew snem.
U Kalyan u la ong, “Ka jingpynbiang ïa ka jingpynïasoh surok sha ki 158 tylli ki jaka sah hapoh ka PMGSY ka dei ka kam kaba sngewhun haduh katta katta ïa nga.”
U la ai khublei ïa kane ka projek surok ha ka jingïalam jong u Myntri Rangbahduh ka ri u Narendra Modi, bad ka jingïatreilang jong u Myntri ka tnat ki kam pynroi ha ki thaiñ nongkyndong jong ka sorkar pdeng u Shivraj Singh Chouhan.
“Ïa ki surok thymmai yn ym pynbha tang na ka bynta ka leit ka wan ha ki jaka jong ka Agency hynrei kin pynïasoh ruh ïa ki shnong kiba jngai bad ki ri bashabar,” u la bynrap.
