Ranchi, Nailar:
Ki samla pule kiba ïakhih pyrshah ïa ki jingkynnoh bym ïahap ha ki eksamin thungkam jong ka Jharkhand ha ka sngi Saitjaiñ, ki la kynthoh ïa ka Jharkhand Mukti Morcha (JMM) kaba synshar bad ka Congress, ba ki ïalehkai politik bad ki mat jong ki, bad ki la pynbna ba kin ïakhih ha ka ïingsah jong u Myntri Rangbah ka jylla ha Ranchi ha ka 20 tarik, Nailar, ban dawa hiar shuki noh ïa u.
Ki nongïakhih ki la ong ba kin thang ruh ïa ki dur jong u Myntri Rangbah ka jylla bad u nongïalam ka Congress u Rahul Gandhi ha kylleng ki 24 tylli ki distrik jong ka jylla ha ka sngi U Blei, da kaba kynnoh ba ka kynhun synshar JMM-Congress kam shym la lah ban shim khia ïa ki jingdawa jong ki.
Ki la dawa ruh ba u Gandhi un weng noh ïa ka jingkyrshan na ka kynhun synrop ba la ïalam da ka JMM lada u “Myntri Rangbah um sngap” ïa u.
Ki nongïakhih ki la pynlong ïa ka ‘Tiranga Yatra’ ha Ranchi ha ka sngi Saitjaiñ ban rakhe ïa ka sngi laitluid ba 80 jong ka ri bad ban pynbor ïa ka jingdawa jong ki ban kham shai bad ban pynkylla ïa ka rukom thoh eksamin thungkam.
Ka jingïakhih hapoh ka JPSC-JSSC Reforms Manch, ka la rung sha ka sngi kaba 22, ha kaba da ki hajar ngut ki samla pule bad kiba kwah kam, kynthup ïa arngut ki nongïakhih kiba shong ha ka thuk thuk, kiba ïashim bynta ha ka ‘Tiranga Yatra’ naduh Jaipal Singh Munda Stadium, ka jaka jong ka jingïakhih kaba dang ïaid shakhmat ha Albert Ekkachiw. Haba rah ïa ki lama ri, ki nongïakhih ki la pynher ïa ki jingthoh kum “Bharat Mata Ki Jai” bad “Vande Mataram”.
“Ngin sa thom ïa ka ïing sah jong u Myntri Rangbah ka Jylla ha ka 20 tarik u Nailar. Ngi pan ïa ka jingiehnohkam jong u namar baroh ar ka JMM bad ka Congress ki la leh kam politik bad ngi. Ngi dawa ruh ïa u Rahul Gandhi ban weng noh ïa ka jingkyrshan na ka kynhun synrop ba la ïalam da ka JMM lada u Myntri Rangbah um sngap ïa u,” ong u nongïalam ka JPSC-JSSC Reforms Pawan Manch.
Ki nongïakhih ki la ong ba kin ym weng noh ïa ka jingïakhih tad haduh ba ka sorkar kan pynbeit ïa ki jingdawa jong ki, kynthup ïa ka jingpynsangeh ïa ki eksamin ha kaba la lap ïa ki jingbym ïahap, bad ka jingtohkit kaba laitluid halor ka rukom thung kam.
Ka rynsan jong ki samla pule ka la pan jingtohkit da ka CBI, lane ka jingtohkit da ka kynhun jong ki nongbishar ba la shongthait na shabar ka Jharkhand, halor ka jingkynnoh ba ki don ki jingleh bymsuidñiew ha ka eksamin.
Ka la dawa ruh ban pyndam noh ïa ka JSSC-CGL test bad ïa ki katto katne ki eksamin Jharkhand PSC kiba ka shim ba ki long kiba suba.
Ki nongthrang kam bad ki samla pule kiba mih ha ka jingïaid paidbah kaba heh ‘Tiranga Yatra’ ban pyrshah ïa ka sorkar Jharkhand halor ka jingmih kot eksamin jong ka JPSC bad ka JSSC-CGL, ha Ranchi, sngi Saitjaiñ, 15tarik, Nailar, 2026.
Ki nongïakhih, ki la kyrpad ïa ki samla pule ha kylleng ka Jharkhand, ba kin ïalum lang ha Ranchi, na ka bynta ka jingïakhih ha ka 20tarik Nailar, bad ki la ong ba kin ym weng ïa ka jingïakhih jong ki, tad haduh ban da urlong ki jingdawa jong ki.
Ki la thmu ruh ïa u Gandhi, da kaba ong ba u la pynpaw ïa ka jingkyrshan ïa ki samla pule hynrei ba “ym shym la don kano kano ka jingleh kaba thikna” kaba la bud. Ka rynsan jong ki samla pule ka la dawa ba ka Congress kan weng noh ïa ka jingkyrshan na ka sorkar ba la ïalam da ka JMM lada kam mon ban leh ïa ki jingeh jong ki.
“Ngi la dawa ban iehnoh kam ïa u Myntri Rangbah u Hemant Soren namar ba ka sorkar kam shym la lah ban pyndam ïa ka JSSC-CGL bad ïa ki eksamin JPSC ha kaba la lap ïa ki jingbym ïahap,” la ong une u nongïalam ka kynhun ki samla pule.
U nongïalam ka JLKM u Devendra Mahto uba la shah jingit la 14 sngi u la kynnoh ba ki pulit ki la khanglad ia u ban mih na Sadar Hospital ban ïashim bynta ha katei ka jingïaid paidbah.
Ki video kiba la kam ba ki pyni ïa u Mahto ba u ïaleh pyrshah bad ki bor pahara katba u dang pyrshang ban mih na katei ka jaka sumar ki la saphriang bha ha ki social media.
Ki nongïakhih ki la pynskhem ba ka jingkhih jong ki kam dei tang ha ki katto katne ki eksamin hynrei ka dei shaphang ka jingshaniah jong ka rukom thung kam baroh kawei bad ka lawei jong ki hajar ngut ki samla kiba kwah kam.
“Ka jinglaitluid kam mut tang ka jinglaitluid na ki phareng, hynrei ka jinglaitluid ruh na ka jingbym ïaryngkat ha ki lad ki lynti, ka bamsap bad ka jingbymhok,” la ong ka JPSC-JSSC Reforms Manch, da kaba kyntu ïa ki samla ban sei ïa ka sur jong ki da kaba suk na ka bynta ki hok jong ki.
U Myntri Rangbah barim ka Jharkhand uba dei ruh u MLA ka BJP, u Champai Soren, u la kynthoh ïa ka sorkar Hemant Soren, ba ka pynïaid ïa ka “sorkar donbor” bad buh jingkylli ïa ka jingbym kwah jong ka ban ai jingmut ïa ka jingtohkit jong ka CBI, halor kitei ki jingkynnoh.
Haba kren bad ki nongthoh khubor ha Bhuiyandih ha Jamshedpur, u Champai Soren u la ong ba da ki spah ngut ki samla pule kiba jngai na la ki jong ki ïing ki hap ban sah beit ha Jaipal Singh Munda Stadium, kane ka la long wat ha ka sngi laitluid jong ka ri.
“Lada phim dei ka bynta jong ka kynhun die kam, kaei ka jingeh ha kaba ai jingmut ïa ka jingtohkit jong ka CBI?” u la kylli.
Ki nongthrang kam bad ki samla pule kiba mih ha ka jingïaid paidbah kaba heh ‘Tiranga Yatra’ ban pyrshah ïa ka sorkar Jharkhand halor ka jingmih kot eksamin jong ka JPSC bad ka JSSC-CGL, ha Ranchi, sngi Saitjain, 15tarik, Nailar, 2026.
Hynrei ka sorkar jylla ka la wad ban pynsngewskhem ïa ki nongkwah kam da kaba pynbna ïa ki lad ki lynti kiba thmu ban pynlong ïa ka rukom thung kam kaba kham shai bad kaba shngaiñ.
Ha ka jingkren jong u ha ka sngi laitluid, u Myntri Rangbah u la ong ba ki jingkylli kiba ïadei bad ki eksamin thung kam ki la pynkhih ïa ka jingshaniah jong ka pateng baroh kawei jong ki nongwad kam.
