Bengaluru, Nailar:
“Ngam dei u nongïalehkai phutbol;nga dei u nongïalehkai shakhmat bad nga tip kumno ban ïaleh pyrshah ïa ka ilekshon sha ka ïingdorbar thawaiñ jong u snem 2028.”
Kane ka dei kaba u DK Shivakumar u la pynpaw ha kaba sdang jong kane ka taïew ha ka jingkren ba nyngkong jong u hapoh ka ïingdorbar jylla kum u Myntri Rangbah ka jylla.
Ka jingïapher kaba u Myntri Rangbah u pyrshang ban pynpaw kam shym la shai bha, namar baroh ar tylli ki jingïalehkai ki donkam ïa ka jingpynïaid kaba heh bha ha ka jaka bad ka jinglah ban pule bha ïa ki jingïalehkai jong ki nongïalehkai pyrshah ban jop ïa ki.
Katba ka jinglah jong u Shivakumar ban ïalam ïa ka seng kan shah tynjuh ha ki jingthep vote, ki nongïalam pdeng jong ka Congress ki i kumba ki la dep ban buh ïa ka jingthmu ban pynkylla ïa ka rukom treikam bad ban pynmih ïa ka seng na ka jingsynshar jong u Myntri Rangbah barim ka jylla u Siddaramaiah.
Bun ki jingjia naduh ba ka seng ka la pyntreikam ïa ka jingkylla nongïalam ha ka jylla ha ka taïew ba nyngkong jong u bnai Jylliew ki pyni ba ka Grand Old Party ka peit shabar jong u Myntri Rangbah barim na ka bynta ka buit treikam jong ka ha u snem 2028.
U Siddaramaiah u dei u pdeng jong ka saiñ hima sima jong ka Congress ha Karnataka naduh ba u la rung sha kane ka seng ha u snem 2006 hadien ba u la mih noh na ka Janata Dal.
Kham hadien ba u la rung sha ka seng, la pynlong ïa u kum u Nongïalam ka Liang Pyrshah ha ka Assembly. Ha ka por ba ka Congress ka la wan ha ka bor ha u snem 2013, u la tam ïa kiba bun ki riew rangbah jong ka seng, kynthup ïa u Mallikarjun Kharge, ban long kum u Myntri Rangbah. U la leh biang ïa katei ka kam ha u snem 2023, da kaba long Myntri Rangbah ha ka sien kaba ar.
Ha kine ki arphew snem ba la leit noh, u la mih kum u nongïalam paidbah uba jrong tam jong ka seng ha ka jylla. U la ker kut ïa la ka jong ka jaka da kaba pynkhlaiñ ïa ka nongrim jingkyrshan jong u ha ka AHINDA (ka kyrteng Kannada na ka bynta ki rit paid, ki jaitbynriew ba sahdien bad ki jaitbynriew Dalit).
U la mad ïa ki jingkynnoh ba u long u ‘nongwei’ ha ka seng bad u pynroi ïa la ka jong ka kynhun. Teng teng, ka jait politik jong u ka tap lup ïa ka seng. U la paw ba u long uba shyrkhei hakhmat ki nongïalam bahakhliehduh jong ka seng.
Ka Congress ka lah ruh ban don bynta ha ka jingkren jong u Siddaramaiah halor ka jingbym ïakhun ïa ka elekshon 2028, da kaba kdew ïa ka rta jong u bad ka jingkylla jong ka saiñ hima sima.
Hynrei ha ka saiñ pyrthei, ka jingbym thikna ka long ka daw kaba khlaiñ bha.
Ha u snem 2018, u Siddaramaiah u la pynpaw ba kan dei ka jingïakhun elekshon kaba khadduh jong u. Kaei kaba la jia hadien kata ka long ka histori mynta.
