New Delhi, Nailar:
Ka BJP ha ka lah sngi U Blei, ka la pynbna ïa ka kynhun treikam thymmai jong ka, hapoh ka jingïalam jong u Nitin Nabin president jong ka seng, ha kaba ka la jer kyrteng ïa ki 13 ngut ki National Vice President, kiba kynthup ïa u Myntri Rangbah barim ka Rajasthan, u Vasundhara Raje Scindia, u nongïalam ka RSS, u Ram Madhav bad u MP jong ka Lok Sabha, u D Purandeshwari.
U Myntri Rangbah barim ka Uttarakhand, u Tirath Singh Rawat, Myntri barim ka sorkar pdeng, u Bharti Pawar, u Manpreet Singh Badal bad u Tariq Mansoor, ki la shah jied kum ki vice president.
U Myntri ka sorkar pdeng u Piyush Goyal u la shah thung kum u nongbat pisa, katba ka seng ka la ai kyrteng ïa ki 16 ngut ki National Secretary, kiba kynthup ïa u Sandeep Pathak u nongïalam barim ka AAP, u Anil Antony bad u Rohan Gupta.
Ka seng ka la bat ïa u B L Santhosh kum u National General Secretary (Organisation) bad ka la wanrah ïa ka Myntri barim ka sorkar pdeng ka Smriti Irani bad Myntri Rangbah barim ka Tripura u Biplab Kumar Deb ha ka kynhun jong ka kaba don 8 ngut ki National General Secretary, katkum ka thup kyrteng ba la pynmih da ka seng.
U Vinod Tawde bad u Sunil Bansal ki dei tang ki arngut ki National General Secretary ba ka BJP ka la bat ha ka kynhun thymmai jong ka.
Ka BJP, ka la wanrah ïa shibun ki khmat thymmai, kiba kynthup ïa ka Kavita Patidar, K Surendran, u Sandeep Pathak bad u Manoj Tigga, ha ka kynhun jong ka, kaba don 16 ngut ki National Secretary na ki jylla bapher bapher.
Ka jingai khublei ïa ki National Office Bearers ba dang shu thung thymmai jong ka BJP bad ïa kito kiba la shah bynshet ha ki kam bapher bapher hapoh ka seng.
Kane ka kynhun ba la thung thymmai ka wanrah lang ïa ka jingshemphang ha ka seng, ka bor bad ka jingïadei jong ki nongshong shnong.
U M Nagaraja, u Lal Singh Arya bad u Varshaben Doshi ki la shah thung kum ki National Vice President jong ka seng BJP, katba u Baijayant Jay Panda, ka Rekha Verma bad u Madhuchandra Kar ki la bat ha katei ka kam, ong ka seng.
Ka seng ka la ai kyrteng ïa u Shivprakash bad u Saudan Singh kum ki nongsynshar ba ïatreilang jong ka ri (Organisation).
U Myntri Rangbahduh ka ri, u Narendra Modi, ha ka lah sngi U Blei, u la ai khublei ïa ki nongkitkam bathymmai jong ka BJP bad u la ong ba ka kynhun ka wanrah lang ïa ka jingshemphang ha ka seng, ka bor bad ka jingïadei na ki nongshong shnong.
“Khublei ïa ki nongkitkam bathymmai jong ka BJP ha ka ri baroh kawei bad ïa kito kiba la shah thung ha ki kam bapher bapher ha ka seng. Kane ka kynhun ba la thung thymmai ka wanrah lang ïa ka jingshemphang ha ka seng, ka bor bad ka jingpynïasoh na ki nongshong shnong,” la ong u Modi ha ka rynsan X.
U Myntri Rangbah u la ong ba u ngeit skhem ba ka kynhun kaba thymmai kan ai ïa kaba bha tam ha kaba pynkhlaiñ ïa ka BJP bad ban pynleit jingmut ha ka jingshakri paidbah. “Ka jingkyrkhu kyrdoh jong nga ïa ki,” u la ong.
