Bhubaneswar, Nailar:
Ki la don kumba 231 ngut ki khynnah skul kynthup ïa ki 91 ngut ki khynnah kynthei bad 10 ngut ki nonghikai kiba la sahkut hapoh kawei ka skul ba la pynïaid da ka sorkar ha ka Pattamundai block ha ka sngi kaba lai lynter namar ka jingshlei um kam shym la pyni dak eiei ban hiar ha ka lah sngi U Blei.
Ka skul Ashram kaba don ha ka shnong Kulasahi kaba hap hapoh ka Penthapala panchayat ka la shah rong noh hadien ba ka umsaw na ka wah Brahmani ka la pynshlei ïa katei ka jaka ha ka sngi Saitjaiñ.
Ki heh sorkar ki la ïathuh ba ka bor synshar distrik ka la rai pyrshah ban pynkynriah ïa ki khynnah skul namar ba ki la shngaiñ hapoh katei ka ïing skul.
“Baroh ki khynnah skul ki don ha ka jingshngaiñ bad ka jingkoit jingkhiah kaba biang hapoh katei ka skul”, la ong u Block Education Officer (BEO) ka Pattamundai u Ajit Barik.
U Raghuram R Iyer collector jong ka Kendrapara ruh u la ong ba ym donkam shuh ban pynkynriah ïa ki khynnah skul bad ki nonghikai kiba sahkut kumba long mynta. “Ngi dang buddien ïa ka jinglong jingman.”
Hynrei ka rai ban ym pynkynriah ïa ki khynnah skul ka la pynbitar ïa ki katto katne ki kmie ki kpa bad ki nongsumar.
“Nga la sahkut ha kine ki ar miet namar ba u khun jong nga uba dang 12 snem ka rta u sahkut ha katei ka skul, ki bor ba dei peit ki dei ban pyllait im mardor ïa baroh ki khynnah skul”, la ong u Sanjay Mallick (43) na Pattamundai.
U Headmaster u Soumendra Das u la ong ba ka umsaw ka la kiew sted naduh ka step Sngi Saitjaiñ bad ka la ngam jyllop ïa ka mala ba nyngkong jong katei ka ïing skul. Ïa ki khynnah pule la pynkynriah sha ka mala kaba ar, ha kaba ki la sahkut ha ka jingshngaiñ. Ka skul ka la buh jingbam na ka bynta shi taïew, ban pynthikna ba ki khynnah skul kin ïoh ïa ka jingbam kaba biang.
Katba ka jinghap slap khlem sangeh ka la wanrah ïa ka jingshlei um ha ki katto katne ki shnong kiba don harud wah ha ki block Aul, Pattamundai bad Rajkanika.
Ka bor synshar distrik ka dang pynkynriah ïa ki longïing na ki jaka ba rit sha ki skul, ki kolej bad ki jaka ri khunswet da ki lieng bad pynbiang ïa ki da ki marbam bad kiwei kiwei ki tiar jingïarap.
Ka Social Worker ka Amarbara Biswal ka la ong ba bun ki nongshnong shnong ki dang sahkut ha la ki jong ki ïing ki sem bad ka jingduna ka bam, katba kiwei pat kiba la leit sah sha ki jaka ba kham jrong ruh ki dang duna ki marbam ba donkam.
Da ki katto katne ki shnong kiba la shah ktah bad ki nongpyllait im kiba duna, ki shnong kiba don harud wah ki dang don ha ka jingma kaba khraw hapdeng ki jingkheiñ lypa ba u slap u jur un dang bteng.
