Bhubaneswar, Nailar:
Da kaba pynbor ïa ki jingdawa kiba bun jait, palat 5,000 ngut ki nongtrei bad ki nongïarap jong ki anganwadi na ki 15 tylli ki projek jong ka ICDS ha kylleng ka Koraput ki la pynlong ïa ka jingïakhih shabar jong ka tnat treikam jong ka distrik ha ka lah sngi U Blei.
Ki nongïakhih hapoh ka lama jong ka Bharatiya Mazdoor Sangh ki la pynlong ïa ka jingïaid paidbah kaba heh bha naduh ka Jagannath temple ha Koraput haduh ka Collector’s office bad ki la pynlong ïa ka jingïakhih ban dawa ban pynkiew ïa ka bainong bad kiwei kiwei ki jingsiew.
Ki la aiti ruh ïa ka jingthoh jingkynmaw, kaba la thoh sha u Myntri Rangbahduh ka ri, u Narendra Modi, sha ki bor synshar distrik, ha kaba ki la kyntu ïa ka sorkar pdeng, ba kan pyrkhat ïa ki jingdawa jong ki bad ban shim ïa ki sienjam mardor, na ka bynta ka bha ka miat jong ki.
Ki nongpynkhih ki la ong ba kane ka jingïakhih ka long ban khring ïa ka jingpyrkhat jong ka sorkar pdeng shaphang ka jingeh kaba nang jur ha ka liang ka pisa tyngka kaba ki nongtrei anganwadi ki ïakynduh bad dawa ïa ki lad jingïada kiba kham khlaiñ ha ka imlang-sahlang.
Ki jingdawa ba kongsan jong ki nongtrei kiba pynkhihwin ki kynthup ban pynkiew ïa ka bainong kaba rit tam shibnai sha ka 30 hajar tyngka, ban pynkiew ïa ka jingsiew kaba rit tam jong ka ESIC na ka 21 hajar sha ka 30 hajar bad ban pynkiew ïa ka penshon EPS sha ka 7,500 tyngka shibnai ryngkat bad ka jingsiew bai lutksan jong ka DA).
Kiwei pat ki jingdawa ki kynthup ïa ka jingmyntoi kaba kham bha na ka bynta ki nongtrei Anganwadi, ka jingpynjlan ïa ki jingmyntoi kiba ïadei bad ka jingkha khun, ka jingsiew kaba mar katjuh bad ka jingshakri na ka bynta ki nongtrei kiba trei ïa ki kam kiba kum kita.
Ki nongtrei bad ki nongïarap jong ka anganwadi ki la ong ba ki don ka bynta kaba kongsan ha kaba pyntreikam ïa ki prokram ai jingbam, ka koit ka khiah bad ka jingpynroi ïa ki khynnah ha ki kyrdan ba hapoh, khamtam ha ki jaka nongkyndong bad ki jaka riewlum. Hynrei ki dang ïai bteng ban ïakynduh ïa ka jingbym biang ka pisa bad ka jingbym biang ki jingmyntoi ha ka imlang sahlang.
