Bhubaneswar, Nailar:
U Myntri Rangbah jong ka jylla Odisha u Mohan Charan Majhi, u la pynbna ïa ka song pisa kaba T.1,000 klur, na ka bynta ki briew kiba shah ktah na ka jingshlei um ha ki katto katne ki bynta jong ka Odisha.
Haba kren ha ki lad pathai khubor shisngi hadien ba u la leit jngoh ïa ki distrik Bhadrak bad Jajpur kiba la shah ktah ha ka jingshlei um, u Majhi u la ong ba ka sorkar ka dang shim ïa ki sienjam baroh ban ai jingïarap mardor bad ban pynbha pat ïa ki jingtei kiba la shah pynjulor.
Ka bynta kaba kongsan jong kane ka song tyngka ka long ka jingïarap na ka bynta ki nongrep kiba ki jingthung jong ki ki la shah pynjulor haduh 33 percent ne palat. Yn kynthup ruh ïa ki nongrep kiba rit bad kiba rit paid.
“Ki nongrep kin ïoh ïa ka Input Subsidy kaba T.8,500 shi hektar na ka bynta ki jaka rep bym don um, T.17,000 shi hektar na ka bynta ki jaka ba ai um bad T.22,500 shi hektar na ka bynta ki jingthung ba 12 bnai,” la ong u Myntri Rangbah.
Ka sorkar kan ai jingïarap ruh lyngba ka Direct Benefit Transfer (DBT) na ka bynta ban thied ïa ki symbai khaw bad ki symbai bym dei khaw. Kane ka song tyngka ka kynthup ruh ïa ki jingïarap na ka bynta ban maramot ïa ki projek pyntuid um da ki Lift Irrigation Project bad ban kyrshan ïa ki briew kiba la duh ïa ka kamai kajih namar ka jingshlei um.
Kumba 9.40 lak ngut ki briew ha ki 1,381 tylli ki shnong ha kylleng ki 74 tylli ki block ha ki 6 tylli ki distrik, ka Bhadrak, Jajpur, Balasore, Keonjhar, Mayurbhanj bad Kendrapara, ki la shah ktah ha ka jingshlei um kaba arsien kaba la mih na ka jingjur jong u slap. Palat 3.70 lak ngut ki briew ki la shah pynkynriah sha ki jaka ba kham shngaiñ.
U Majhi u la ong ba 45 tylli ki kynhun jong ka ODRAF, 8 tylli ki kynhun jong ka NDRF bad 64 tylli ki kynhun jong ka Fire Services la pynpoi sha ki distrik kiba la shah ktah na ka bynta ban pynlait im bad ai jingïarap. La plie ruh palat 550 tylli ki jaka ai jingïarap ban pynbiang ïa ki marbam bad ki jingdonkam.
U Myntri Rangbah ka jylla u la ong ba ka sorkar jylla ka kut jingmut ha ka rukom treikam jong ka kaba Long Zero-Casualty. La buh ïa ki bor pynïaid ka koit ka khiah ha ka jingpeitngor kaba jur bha ban ïada na ki jingpang ba ïoh na ka um, ha kaba la phah ïa ki dawai bad kiwei kiwei ki tiar sumar sha ki jaka ba shah ktah.
