Chandigarh, Nailar:
Ban pynthymmai bad pynïar ïa ki kali paidbah ha kylleng ki thaiñ nongkyndong, u Myntri ka tnad Transport jong ka Punjab, u Harpal Singh Cheema, u la pynbna ha ka lah sngi U Blei ba 100 tylli ki bos ‘PRTC JUNIOR’ kiba pawnam ha ka pyrthei, kin sa rung thikna sha ka kynhun jong ka PRTC (PEPSU Road Transport Corporation) ha ka shiteng bnai jong u Nailur mynta u snem.
Kane ka jingpynbna ka la long hadien ka jingïalang bishar bniah kaba la pynlong bad ki heh ophisar jong ka tnad kit mar jong ka Punjab ban bishar bniah ïa ki jingpynbha ïa ki jingtei kiba dang ïaid shakhmat bad ki jingpynheh ïa ki jingshakri.
U Myntri Rangbah u la pynpaw ba ïa kine ki bos midi ba la shna pura la shna bad pynpoi da ka Eicher.
Ha ka jingïalang bishar bniah ha ka kyrdan bahakhliehduh, u Myntri ka tnat Transport u Harpal Singh Cheema u la bthah kyrpang ïa ka tnad kit mar ban wanrah ïa ki jingmut kiba thymmai kiba thmu ban kyntiew shuh shuh ïa ka jinglong jingman jong ka jingshakri paidbah.
U la ban jur ïa ka jingdonkam kaba kongsan ban pynkiew ha kajuh ka por ia ki lad kamai ban pynthikna ïa ka jinglong jingman ha ka liang ka pisa tyngka ha ka por ba jrong bad ka jingpynkhlain ïa ka jingtreikam jong baroh ar ka PRTC bad ka PUNBUS.
Haba pynpaw ïa ka jingpynbor jong ka sorkar jylla ban pynthymmai ïa ki kali paidbah, u la pynbna ba 1,279 tylli ki bos thymmai ki dang shah pynrung ha ka kynhun jong ki bos jong ka jylla.
U la ong, “Kane kan pynkiew ïa ka jingdon jong ki bos sorkar na ka 2,267 sha ka 3,546, kaba dei ka jingpynrung kaba heh tam ha ki 20 snem bad kan rah ïa ka Punjab shajan ban long ka jylla kaba treikam bha ha ka ri.”
U Myntri ka tnad Transport u la ong ba ka sorkar u Bhagwant Mann ka pynkhlaiñ ruh ïa ka jingïadei na ka bynta ki NRI, ki nongleit jingleit nabar ri, bad ki nongleit jingleit ba man ka por.
U la pynpaw, “Kum shi bynta jong kane, ngi la pyntreikam 15 tylli ki bos Premium Airport ha kad liengsuiñ kiba rem dor, kynthup ïa ki bos Volvo na Jalandhar bad Ludhiana sha ka kad liengsuiñ Delhi. Kane kan pyllait na kino kino ki jingshah pynthut bad kan pynsuk ïa baroh.”
Ha kane ka jingïalang bishar bniah la ïohi ïa ka jingïashim bynta da ki heh ophisar na ka tnad kit ka bah, kiba kynthup ïa u Secretary Transport Varun Roojam, Managing Director, PUNBUS, Rajiv Kumar Gupta, Managing Director, PRTC, Manisha Rana, Additional Managing Director, PRTC, Navdeep Kumar, bad General Manager, PRTC, Chandigarh, Amanvir Tiwana.
