Chennai, Nailar:
Ha ryngkat ka jingdonlang jong u Myntri ka tnat ki kam pohïing jong ka sorkar pdeng u Amit Shah, u Myntri Rangbah jong ka Tamil Nadu u Joseph Vijay ha ka sngi Palei u la pynpaw ki jingpyrshah jong u ïa ka NEET bad ka Delimitation Bill; la dawa ïa ka hok ha ka liang ka pisa tyngka na ka bynta ki jylla ba Shathie bad la pynlong ïa ka mukotduma na ka bynta ka um Cauvery.
U Shah ha ka sngi Palei u la pynïaid ïa ka jingïalang kaba 31 jong ka Southern Zonal Council ha Mahabalipuram jong ka Tamil Nadu.
U Shah u dei u Chairman jong ka Southern Zonal Council, katba u Myntri Rangbah ka Tamil Nadu u dei u Vice-Chairman jong ka.U Vijay u la pyni ïa ka mukotduma kaba tyngeh pyrshah ïa ka eksamin NEET kaba la pynlong pdeng na ka bynta ki kolej doktor da kaba ong ba ka long ka bym hok ia ki samla pule kiba wan na ki longïing kiba duk bad nongkyndong.
“Ka Tamil Nadu ka la pynskhem beit ba ka National Eligibility cum Entrance Test (NEET) ka pynkhreh ïa ki samla pule na ki nongkyndong bad ki jaitbynriew kiba duna ka ïoh ka kot ha ka imlang sahlang ha ka kyrdan kaba kyrpang.
Ka jingduhnong, kaba pynduhjait ïa ka rukom treikam jong ka jylla kaba la slem bha jong ka jinglah ban ïoh ïa baroh kaba la pynshong nongrim ha ka jinghikai skul,” la ong u Vijay.
Ha ka phang jong ka jingïakhih jong ki samla pule dang shen halor ka jinglait jingkylli jong ka NEET, u Vijay u la dawa ba dei ban ailad ïa ka Tamil Nadu ban pdiang ïa ki samla pule katkum ka marks jong ka Class XII.
“Nga kyntu ïa ka sorkar pdeng ban ailad ïa ka Tamil Nadu ban pyndap ïa baroh ki jaka hapoh ka bhah jong ka jylla ha ki jingpule MBBS, BDS, bad AYUSH tang da kaba pynshong nongrim ha ki marks jong ka Class XII, da kaba ïadei bad ka rukom pdiang khynnah jong ka jylla kaba la pynshisha bad kaba ïadei dur.”
U Vijay u la sdang ruh ïa ka jinghiar thma halor ka jingthmu ban pynbeit pud da ka Centre da kaba kdew ba ki jylla ba Shathie ki lah ban duhnong ha ka jingïalang kum ka “jingpynshitom” na ka bynta ban tehlakam ïa ka jingbun briew.
“Nga kyntu ïa ka sorkar pdeng ban ai ïa ka jingpynthikna aiñ kaba shai ba ym don kawei ruh ka jylla ka ban mad ïa ka jingduna ha ka jingdon jong ki nongmihkhmat ha Parliament namar ka jingjop jong ka ha ka jingpynbeit ïa ka jingbun briew,” la ong u Vijay.
Ka sorkar pdeng ka la pynskhem ba ym don ka jylla ka ban duh ïa ki seat kum shi bynta jong ka jingthmu ban pynbeit ïa u pud u sam. Ka sorkar ka dang pyrshang ban pynlong ïa ka Delimitation Bill ban mynjur ha Parliament hynrei haduh mynta kam shym la urlong satia.
Ha ryngkat ka jingïadonlang ruh u Myntri Rangbah ka Karnataka u DK Shivakumar ha ka rynsan, u Vijay u la pynpaw ruh ïa ka jingkynthoh kaba khlaiñ na ka bynta ka bhah jong ka Tamil Nadu ïa ka um Cauvery kaba la long ka jingeh kaba la slem bha hapdeng kine ki ar tylli ki jylla ba marjan.
“Ar tylli ki nongrim ki dei ban ïalam ïa ngi. Nyngkong, ki hok kiba dei hok jong ki jylla kiba don ha ki rud wah kiba kham poh bad ki jingim kiba shong ha ka jingtuid jong ki wah kiba la pynthikna ki dei ban long kiba la ïada pura. Kaba ar, ki jingbishar jong ka ïingbishar bahakhliehduh, ki jingai jong ki iingbishar ba la thaw hok, bad ki rukom treikam aiñ kiba la buh ha ka aiñ ki dei ban long kiba la pyntreikam bad pyntreikam bha.”
Haba khot ïa ka jingsynshar paidbah kaba ïaryngkat ha ka liang ka pisa tyngka, u Vijay u la ong ba ki jylla ba Shathie ki ai bor ïa ka jingroi jong ka ri bad ki dei ban ïoh ïa ka bhah kaba dei jong ki.
“Katba ka India ka dang pynkhreh ïa ka Finance Commission ban wan, ka rukom pynkylla ïa ka pisa tyngka ka dei ban ithuh ïa baroh ar ka jingdonkam bad ka jingtreikam. Ki jylla kiba la bei tyngka ha ka roi ka par, ka jingpynïaid ïa ka pisa tyngka, bad ka jingkylla ha ka jingbun briew kim dei ban shah buh ha ka jingeh,” u la ong.
“Ki Jylla ba Shathie kim wad ïa ka jingleh kaba kham kyrpang, hynrei ïa ka jingleh kaba hok bad kaba ïadei dur,” u la bynrap.
Ka Southern Zonal Council ka kynthup ïa ka Andhra Pradesh, Karnataka, Kerala, Tamil Nadu bad Telangana, ha ryngkat ki Union Territories jong ka Puducherry, Andaman bad Nicobar Islands bad Lakshadweep.
Ha kane ka jingïalang la ïashim bynta da ki Myntri Rangbah bad ki heh nongmihkhmat na ki jylla ka thaiñ Shathie bad Union Territory.
